Papa, të rinjve: Koreja është një e vetme, bashkimi i vendit është i mundur
Papa, që nuk deshi të flasë anglisht e mënjanoi letrat për t’u folur të rinjve koreanë
italisht, sepse “kështu mund t’ju flas me zemër”, u tha; Papa, që u ndal një çast
për t’u lutur së bashku me 6 mijë të pranishmit, me duar të bashkuara në heshtje,
për unifikimin e dy Koreve; Papa, të cilit një i ri, duke e lënë gjuhën koreane, iu
drejtua në italisht, që Ati i Shenjtë ta kuptonte, e i tha thjesht: “Shenjtëri, unë
quhem Gjon”; Papa, që u flet të rinjve me shembëlltyrat dymijëvjeçare të Ungjillit,
por i interpreton me aq shpirt, sa të duken krejtësisht të reja; Papa, që edhe një
herë, u kërkon të rinjve të mos dëshpërohen e të shpresojnë; Papa, të cilit ipeshkvi
i Daejonit i tha me bindje “Atë i Shenjtë, ecni përpara për ungjillëzimin e botës
e të Kishës, duke u mbështetur tek ne. Jemi me Ju, Shenjtëri”: ky ishte Papa Françesku,
që sot në një tendë të madhe në shenjtëroren e Solmoes, u takua me 6 mijë të rinjtë
e Ditës Aziatike të Rinisë, pasi krishte drekuar me përfaqësues rinorë nga vende të
ndryshme të kontinentit. Të rinjtë katolikë
kanë ardhur nga 23 vende aziatike në një Ditë, tema e së cilës evokon shën Gjon Palin
II e thirrjen e tij “Çojuni, të shkojmë”, e cila tingëlloi fuqishëm në mbyllje të
Jubileut të Madh të vitit 2000. “Rini e Azisë, çoju! Lavdia e martirëve ndriçoftë
mbi ty”. Pikërisht Papa Vojtila pati shpallur shenjt në Seul, në vitin 1989, Andrea
Kim Dae-Geon, koreanin e parë shuguruar meshtar, martirizuar së bashku me shokët e
tij. Sapo mbërriti në Solmoe, Papa Françesku u ndal në lutje para shtëpisë së vogël
ku lindi e banoi martiri. Takimi me të rinjtë e Azisë u hap e u mbyll me këngë.
Spikati një inskenim artistik i delegacionit indonezian shumëngjyrësh, me përfaqësues
nga 5 kulturat e arqipelagut. Papa Françesku ndoqi me vëmendje edhe një shfaqje muzikore
koreane, me bazë shembëlltyrën e djalit plangprishës (Lk 15,11-32). Pas përshëndetjes
së ipeshkvit të Daejonit, imzot Lazër You Heung-sik, i cili vuri në dukje jo vetëm
martirizimin e Kishës në Kore, por edhe sfidat e sotme si mënjanimi i etikës, këndvështrimi
ateist mbi botën, shkatërrimi i jetës dhe i ambientit, tre të rinj nga Kamboxha, Hong
Kongu dhe Koreja, dhanë dëshminë e tyre të krishterë e i bënë pyetje Atit të Shenjtë.
Të cilave, Papa iu përgjigj pa letër. Të dëgjojmë të dërguarin e Radio Vatikanit në
Seul, Patrick Sean Lovett:
“Në një çast, gjatë takimit të Papës me rininë
e Azisë, në shenjtëroren e Solmoes, u pa qartë se Atit të Shenjtë i kishte ardhur
në majë të hundës leximi i tekstit të përgatitur në anglisht. Por, më parë, i pyeti
të rinjtë nëse ishin të lodhur e nëse do ta lejonin t’u fliste (natyrisht, pa letër)
në italisht: ‘Një miku im – tregoi Papa, duke improvizuar në anglisht
– më tha se nuk mund t’u flas të rinjve me letër përpara. Duhet t’u flasësh nga zemra’. Duartrokitjet
e stuhishme, që pasuan, i mjaftuan Papës si inkurajim për të filluar një bisedë, në
stilin e tij familjar të dialogut. Menjëherë, qëndrimi i tij ndryshoi e bashkë me
të, edhe e gjithë atmosfera përreth. Të rinjtë filluan ta dëgjojnë me vëmendje më
të madhe e Ati i Shenjtë u foli përnjimend ‘nga zemra’. Iu përgjigj me ndershmëri
e sinqeritet pyetjeve të tyre dhe i ftoi të gjithë të luten në heshtje për bashkimin
e të dyja Koreve. Asnjë pipëtimë gjatë lutjes: ‘Mos vallë ka dy
Kore? Jo, është një, por e ndarë… familja është e ndarë. E kjo të dhemb. …Koreja është
një, është një familje e vetme. Ju jeni vëllezër, që flisni të njëjtën gjuhë’. Pjesë
e shfaqjes artistike përgatitur nga të rinjtë për Atin e Shenjtë ishte edhe dramatizimi
në muzikë i shembëlltyrës së Djalit Plangprishës. Papa Françesku e kapi këtë temë
për të shpjeguar mesazhin e Zotit, i cili ‘pret gjithnjë kthimin tonë… e na uron mirëseardhjen
kur hyjmë në shtëpinë e Tij’: ‘Askush prej nesh nuk e di ç’e pret
në jetë: mund të bëjmë gjëra të shëmtuara, tepër të këqia, por Ati Qiellor na pret,
pret të kthehemi në shtëpi e megjithëse unë jam mëkatar, prapë më fal… Ju meshtarët,
ju lutem, përqafojini mëkatarët e kini mëshirë për ta’. E papritura tjetër
e pasdites (me orën e Koresë): Papa Françesku i premtoi një vajze të re nga Kamboxhia
se sapo të kthehet në Romë, ‘do të flasë me Anxhelon’ (është fjala për kardinalin
Anxhelo Amato, prefektin e Kongregatës për Çështjet e Shenjtorëve) e do t’i thotë
të bëjë diçka për lumnimin e martirëve kamboxhianë, të cilët janë shenjtorë, pavarësisht
se Kisha nuk i njeh akoma. “Papa Françesku ejani në Kamboxhia për të nderuar viktimat
e Pol Potit” i kërkoi vajza, duke u kujtuar të gjithëve diktatorin e tmerrshëm të
vendit, në periudhën 1976-1979, përgjegjës i drejtpërdrejtë për torturimin e masakrimin
e rreth një milion gjysëm njerëzish, të cilëve u shtohen edhe të vdekurit nga puna
e detyruar, ushqimi i keq e mungesa e asistencës shëndetësore. Qindra mijëra vetë…
një genocid i vërtetë me bazë idelogjinë marksiste, gjatë të cilit humbi jetën një
e treta e popullsisë kamboxhiane. E s’paska shenjtorë pra, Kamboxhia? E Papa, vajzës: ‘Unë
të premtoj se kur të kthehem në shtëpi, do të merrem me këtë, do të flas me të ngarkuarin
për këto gjëra. Është njeri i mirë dhe e quajnë Engjëll… do t’i them atij të punojë
për këtë çështje’. Energjia e Papës dhe e të rinjve mund të thuash se e
ndezi tendën. Kaq shumë buzëqeshje, duartrokitje, entuziazëm e njerëz në festë! Papa
Françesku dukej i rilindur nga kjo energji, nuk mungoi të bënte edhe “selfie”-n e
pashmangshëm në fund të takimit, i bindur se kishte arritur t’ua transmetonte këtë
energji të rinjve, të cilëve që në fillim u tha (kësaj radhe në anglisht): “Dear
young friends, in this generation… ‘Të dashur miq, në këtë çast, Zoti beson
në ju! Ai ka hyrë në zemrat tuaja ditën e pagëzimit; ju dha Shpirtin Shenjt në ditën
e krezmimit; ju përforcon vazhdimisht përmes pranisë së Tij në Eukaristi, që ta dëshmoni
para botës. A jeni gati t’i thoni ‘po’? A jeni gati?’ ‘W Papa! W
Papa!...’ Përgjigja në kor dhe thirrjet ‘Rroftë Papa’ nuk patën
nevojë për tjetër interpretim. Të rinjtë e kishin kuptuar thirrjen e Atit të Shenjtë
për ta lënë Zotin të vendosë se ç’rrugë duhet të marrin në jetë. Papa Françesku u
largua me një makinë koreane, e cila thuhet se do të shitet e shuma e mbledhur do
të përdoret për bamirësi, sipas dëshirës së vetë Atit të Shenjtë. Natyrisht!