Kryeipeshkvi i Bagdadit: të ndalet “buldozeri”, që ia ndryshon faqen Lindjes së Mesme
Në Irakun e pështjelluar nga dhuna e xhihadistëve, po punohet për formimin e një qeverie
të bashkimit kombëtar, pas zgjedhjes së kryeministrit Haider al Abadi. Ndërkaq, vazhdojnë
sulmet amerikane kundër milicëve të ISIS-it, të cilët, gjatë orëve të fundit, kanë
marrë peng 600 gra të pakicës yazide. Të dëgjojmë dëshminë e kryeipeshkvit të Bagdadit
të Latinëve, imzot Jean Benjamin Sleiman: Lajmet e fundit nuk janë shumë të
ndryshme nga të parat. Para së gjithash, kemi gjendjen tragjike të të krishterëve
e të të tjerëve, që kanë humbur gjithçka. Akoma, jo të gjithë janë sistemuar. Tani
kemi një kryeministër të ri e shpresojmë të formojë një qeveri, që t’i përfaqësojë
të gjithë, por kjo shoqërohet edhe me një lloj frike. Shpresojmë që zgjedhja e tij
t’i hapë udhën normalizimit të gjendjes, sepse paniku është gjithnjë i pranishëm. Në
këtë çast, duhet shpëtuar jeta e njerëzve, si ajo e të krishterëve, e yazidëve… Ka
edhe një kategori tjetër për të cilët flitet pak, që janë kurdët shiitë: edhe ata
janë sulmuar e përzënë. Është një pakicë tjetër, e vogël në numër. Pasi Perëndimi
nuk lëvizi as gishtin, tani, amerikanët kanë filluar bombardimet, por gjendja mbetet
e ndërlikuar… Ne jemi bij të Kishës. Ka pasur një Papë që pati thënë: nëse
bëni luftë kundër njerëzimit e bëni kundër Zotit. Nuk e citoj tekstualisht, por këtë
e pati thënë Gjon Pali II, tashmë shenjt. Të mos fshihemi pas ‘politikisht korrekt”-it.
Problemi nuk vjen prej këndej, vjen nga Perëndimi! Të ndalet ky „buldozer” që dëshiron
të ndryshojë gjithçka në Lindjen e Mesme… plani si ai i Babelit, i kullës së Babelit,
do të përfundojë gjithmonë me vende copë-copë e me njerëz e bashkësi copë-copë… Nuk
duhet të fshihemi: problemi vjen nga një lloj i caktuar politikash ndërkombëtare.
Në dukje është problem shiit-sunit, pastaj kristano-islamik: por e gjithë kjo, nuk
është e vërtetë! Të krishterët e të gjithë irakianët janë edhe të dëshpëruar,
sepse kjo luftë nuk mbaron kurrë… Nuk mbaron kurrë. Ka shumë njerëz të ndershëm,
shumë njerëz, që duan të jetojnë në paqe. Për të bërë luftë mjaftojnë njëqind koka
‘tymçe’, që mbajnë armë, por shumica e njerëzve do të jetojë ndershmërisht, denjësisht. Cilat
janë shpresat tuaja? Ç’mund të thoni për këtë? [Them] se po mbartim një kryq,
por ky kryq është ai i Krishtit: Ai mund ta ndryshojë historinë njerëzore. Historia
jonë bazohet në një mrekulli hyjnore. Nëse flasim si njerëz, duhet të themi se jemi
të paaftë, të pafuqishëm. Vetëm Zoti mund të na shpëtojë.