Кардынал Філоні: Папа хацеў бы быць побач з народам Іраку
Святы Айцец хацеў
бы асабіста быць побач з народам Ірака, расказаў у інтэрв’ю Ватыканскаму тэлевізійнаму
цэнтру кардынал Фернанда Філоні, напярэдадні свайго адлёту на Блізкі Усход, у якасці
спецыяльнага пасланніка папы Францішка. “Ён даверыў мне гэта заданне, менавіта для
таго, каб я прынёс глыбокую любоў і салідарнасць Папы да гэтых бедных нашага часу”,
сказаў пурпурат. “Святы Айцец ужо шмат разоў дэманстраваў сваю заклапочанасць адносна
найскладанейшай сітуацыі, якая ўзнікла ў Іраку для многіх хрысціян, але таксама і
іншых меншасцяў, якія сустрэліся з пераследам і былі вымушаны ўцякасць. Гаворка ідзе
таксама пра мільён людзей, якія засталіся без даху над галавой і шукаюць бяспечнага
месца для ўласнага жыцця і будучыні”, - пракаментаваў сітуацыю кардынал Філоні.
“Мая
прысутнасць павінна таксама падтрымаць хрысціян псіхалагічна, запэўніць іх у існаванні
будучыні. Я перакананы, што ўлады зробяць усё магчымае, каб вярнуць хрысціянам дабрабыт,
будучыню, бяспеку. Але яны павінны таксама адчуваць, што Паўсюдны Касцёл – з імі,
што іх не пакідае, што лічыць іх каштоўнымі для гэтай зямлі, каб яны яшчэ мелі веру
ў сябе і адносіны, якія могуць устанавіць з іншымі”, - сказаў кардынал Філоні.
Пурпурат
падзяліўся, што ў рамках сваёй місіі ён будзе спрыяць большай увазе з боку іракскіх
уладаў да праблемаў мясцовых хрысціян, прааналізуе магчымасці канкрэтнай дапамогі
ў існуючай сітуацыі і падзякуе ўсім, хто дзейнічае на карысць насельніцтва краіны.