Mijëra të krishterë ikin nga sytë këmbët në Irak. Patriarku Sako: katastrofë humanitare
Pavarësisht nga përpjekjet, aleanca e luftëtarëve kurdë të Irakut, Sirisë dhe Turqisë
nuk ia del dot të mbrojë popullsinë civile, pakicat dhe mijëra të krishterët nga furia
e xhihadistëve të Shtetit islamik në veri të Irakut. Rreth 150 mijë të krishterë po
ikin drejt Kurdistanit, pa asnjë mbrojtje. Alarmin e dha sot në mëngjes Patriarku
i Babilonisë së Kaldejve, Louis Raphael I Sako. “Katastrofë humanitare” e quan ai
këtë eksod të ri, të nesërmen e Ditës së Lutjes për Paqen në vend, e cila, fatkeqësisht,
u shoqërua me 50 atentate, që shkaktuan 30 të vdekur e 70 të plagosur. Qindra gra e
vajza të pakicës fetare yazide janë marrë peng nga xhihadistët, të cilët, sipas burimeve
qeveritare, kanë masakruar edhe 500 burra të së njëjtës bashkësi. Kujtojmë se yazidizmi
është fe 4000 vjeçare, e cila me kohë, ka marrë elemente edhe të krishterimit e të
myslimanizmit. Ndjekësit e saj janë kurdë, që jetojnë kryesisht në zonat rreth Mosulit,
gjithsej 500 mijë vetë. Myslimanët e tjerë i konsiderojnë apostatë dhe i quajnë adhurues
të djallit. Vazhdon pra avancimi i milicëve ekstremistë, që pas Mosulit, të dielën,
pushtuan edhe qytetin e Sinjarit, duke sulmuar sistematikisht popullsinë, ose për
arsye etnike, ose për arsye fetare. Këshilli i Sigurimit i OKB-së e quan këtë “krim
kundër njerëzimit”, por nuk mjafton, denoncon Patriarku i Kaldejve, imzot Sako, në
mikrofonin tonë:
Sot kemi boshllëk në boshllëk. Qeveria nuk ka forcë për
të kontrolluar vendin. Tani kemi edhe zgjedhjet parlamentare e nuk ka forcë për të
sulmuar, nuk ekziston një ushtri e vërtetë, në ndryshim nga Siria, ku forcat e armatosura
janë aktive. Këtu, kurdët po tërhiqen, kanë vetëm armë të lehta. Sot, mijëra njerëz
kanë marrë rugën për të ikur, që prej 3-4 orësh. Janë gra, të moshuar, fëmijë: duhet
mobilizuar opinioni publik dhe shoqëritë e të gjitha vendeve. Kjo është katastrofë
humanitare!