“Благаслаўленні –
гэта шлях, які Бог указвае ў якасці адказу на жаданне шчасця, уласцівае чалавеку”,
- адзначыў папа Францішак падчас першай пасля перыяду летняга перапынку агульнай аўдыенцыі.
Яна прайшла 6 жніўня 2014 г. у ватыканскай Зале Паўла VI, а не на плошчы св. Пятра,
з прычыны спякотнага надвор’я. Пантыфік прыбыў на сустрэчу з вернікамі каля 10.00
і напачатку асабіста прывітаў многіх з іх. Святы Айцец працягнуў цыкл катэхез аб Касцёле,
звяртаючы ўвагу на навізну, якая характарызуе супольнасць вернікаў: “гаворка ідзе
пра новы народ, заснаваны на новым запавеце устаноўленым Панам Езусам праз дар Ягонага
жыцця. Гэта навізна не адмаўляе папярэдні шлях і не супрацьпастаўляецца яму, але вядзе
да яго спаўнення”, - сказаў Францішак. У першую чаргу Папа звярнуў увагу на постаць
св. Яна Хрысціцеля, які злучыў Стары і Новы Запавет. Ён рыхтаваў дарогу да прыходу
Хрыста, схіляючы людзей да навяртання і прыняцця Божага суцяшэння. “Ян займае цэнтральнае
месца ва ўсім Пісанні, бо становіцца мастом паміж абяцаннем Старога Запавету і яго
спаўненнем, паміж прароцтвамі і іх рэалізацыяй у Езусе Хрысце. Сваім сведчаннем Ян
указвае нам на Езуса, запрашае ісці за Ім, і кажа, без складаных тэрмінаў, што гэта
патрабуе пакоры, пакаяння і навяртання”, - сказаў Папа.
Францішак заўважыў,
што як Майсей заключыў запавет з Богам на падставе закону атрыманага на гары Сінай,
так і Езус, з пагорку на беразе Галілейскага возера, перадаў сваім вучням і натоўпу
людзей новае навучанне, якое пачынаецца з благаслаўленняў. Паводле Папы, благаслаўленні
ўказваюць шлях да шчасця і ўдасканальваюць запаведзі Старога Запавету. Многія, пра
іх не ведаюць ці не памятаюць, але на думку Святога Айца, да іх важна пастаянна звяртацца
ў жыцці.
“У гэтых словах прысутнічае ўся навізна прынесеная Хрыстом: сапраўды,
благаслаўленні – гэта партрэт Езуса, яго форма жыцця; а таксама гэта шлях да сапраўднага
шчасця, якім таксама і мы можам прайсці, дзякуючы ласцы, якую Езус дорыць”, - сказаў
ён.
Акрамя новага закону, Папа звярнуў увагу на іншыя словы Езуса, з якімі
трэба заўсёды лічыцца ў штодзённым жыцці. Яны знаходзяцца ў 25 раздзеле Евангелля
ад Мацвея і з’яўляюцца, паводле Святога Айца, сапраўдным “пратаколам”, паводле якога
будзем судзімы.
“Мы не будзем мець тытулаў, перавагаў, прывілегій. Пан пазнае
нас, калі мы ў сваю чаргу пазнавалі Яго ў бедным, галодным, убогім ці маргіналізаваным,
пакутутуючым і самотным... І гэта адзін з фундаментальных крытэрыяў праверкі нашага
хрысціянскага жыцця, з дапамогай якога Езус нас запрашае вымяраць яго кожны дзень”,
- сказаў Святы Айцец.
Пантыфік адзначыў, што новы запавет заключаецца ў тым,
каб убачыць сябе ў Хрысце, атуленым міласэрнасцю і спачуваннем Божым. “І гэта напаўняе
наша сэрца радасцю, і гэта робіць з нашага жыцця цудоўнае і пераканаўчае сведчанне
любові Бога да ўсіх братоў, якіх сустракаем штодзённа”, - сказаў ён.
Напрыканцы
агульнай аўдыенцыі Святы Айцец нагадаў пра гадавіну смерці папы Паўла VI, які адышоў
у вечнасць 6 жніўня 1978 г. Францішак падкрэсліў любоў гэтага Пантыфіка да Касцёла
і заклікаў браць з яго прыклад і чэрпаць натхненне.