Papa: familja, qendër dashurie, ku askush nuk mënjanohet
Familja është qendër dashurie, ku askush nuk mënjanohet: kështu shkruan Papa Françesku
në mesazhin, që i dërgon Kongresit të parë amerikanolatin mbi Baritorinë e Familjes.
I filluar në Panama më 4 gusht,takimi i madh do të përfundojë më 9 të këtij muaji.
Organizuar nga Këshilli i Konferencave Ipeshkvnore të Amerikës Latine, ky kuvendim
ka si temë: “Familja dhe zhvillimi shoqëror për jetën e begatë dhe bashkimin misionar”.
“Çfarë është familja?” pyet Papa në mesazh. E përgjigjja e tij është e qartë:
familja është “qendër dashurie”, në të cilën mbretërojnë “ligji i respektit dhe i
bashkimit”, i aftë t’u rezistojë manipulimeve të kësaj bote. Familja, nënvizon Ati
i Shenjtë, na ndihmon ta kapërcejmë kundërvënien e rreme ndërmjet individit e shoqërisë.
Askush nuk mënjanohet brenda saj, as të moshuarit e as fëmijët. E ajo është vendi
ideal për lindjen e kulturës së takimit e të dialogut. Aty mësojmë t’i afrohemi Zotit
e të tregohemi solidarë me të tjerët. Papa vë në dukje dy karakteristika të veçanta
të familjes: qëndrueshmërinë dhe fekonditetin. Aspekti i parë, që rrjedh nga “dashuria
besnike deri në vdekje”, formon indin bazë të shoqërisë njerëzore. Ndërsa, fekonditeti,
vijon Ati i Shenjtë, nuk do të thotë vetëm lindja e një jete të re, por e një bote
të re, që vjen së bashku me brezin e ri. Pavarësisht nga dëshpërimi, që mund të na
kaplojë nganjëherë, pasi gjërat nuk shkojnë gjithnjë mirë, në familje është e mundur
bashkëjetesa e bazuar mbi respektin e besimin, sepse ajo nuk e konsideron njeriun
vetëm me përmasën utilitariste, por udhëheq e shoqëron dëshirat e tij më të thella.
Familja, thekson më tej Ati i Shenjtë, është objekt dhe subjekt i ungjillëzimit.
Pikërisht, në përvojën familjare njeriu kupton ç’do të thotë Zoti-Atë dhe e thith
fenë së bashku me qumështin e nënës. Papa Françesku kujton sërish tri fjalët e tij
të dashura për familjen: “më fal, faleminderit e të lutem” e ai vetë i lutet Virgjërës
së Guadalupes ta bëjë çdo familje burim “jete, harmonie e feje”.