Kardinali Parolin: Kisha katolike në Kinë është e gjallë
“Kisha katolike në Republikën popullore kineze është e gjallë e aktive. Ajo përpiqet
t’i qëndrojë besnike Ungjillit, edhe pse ecën përmes kushtëzimesh e vëshirësish”.
Këtë deklaron sekretari i Shtetit të Vatikanit, kardinali Pietro Parolin, në një intervistë
dhënë revistës “Familja e Krishterë” . “Selia e Shenjtë, shton hirësia e tij, është
në favor të dialogut respektues e konstruktiv me autoritetet civile, për të gjetur
rrugëzgjidhjen e problemeve, që i kufizojnë katolikët në ushtrimin e plotë të fesë
si dhe për të garantuar klimën e lirisë së vërtetë fetare” Duke folur, pastaj,
për Korenë, në prag të shtegtimit të Atit të Shenjtë, kardinali Parolin nënvizon:
“Nga një hulumtim i kohëve të fundit, del se Kisha katolike në këtë vend, me besimtarët
e saj të shumtë, është bashkësia fetare, që ndikon më shumë nga të gjitha të tjerat,
mbi jetën e shoqërisë vendase”. Papa Françesku, kujton më pas prelati i lartë, do
të shkojë në Kore edhe për të çuar atje mesazhin e paqes, të pajtimit e të bashkimit,
e jo më pak, për t’i dhënë nxitje të re dialogut e për të kontribuar në sheshimin
e konflikteve, që i hapin akoma plagë gadishullit e popullit korean. “Jam i bindur,
shton sekretari i Shtetit të Shenjtërisë së Tij, se mesazhi i Papës do të gjejë zemra
e mendje të hapura për ta pranuar”. Koreja e Jugut është vendi i parë aziatik,
që ka hirin, e edhe nderin, të presë Françeskun, vizita e të cilit vërteton me sa
vëmendje e ndjek Papa jetën e këtyre trojeve.