Kinë. Një ipeshkëv denoncon fushatën e rrënimit të kishave
Imzot Vinçenc Zhou Weifang, ipeshkëv i Wenzhousë, në Kinë, ka denoncuar qeverinë e
Zhejiangut për shkatërrimin e disa kishave dhe rrënimin e kryqeve në kishat protestante
e katolike të provincës. Prelati – thotë agjencia AsiaNews – ka shpërndarë një letër
baritore më 30 korrik, në të cilën u thotë besimtarëve “të mos kenë frikë, por të
kenë fe”. Më 31 korrik edhe meshtarët e tij u kanë kërkuar autoriteteve ta ndalin
fushatën që vijon prej disa muajsh. Disa besimtarë katolikë e protestantë janë lënduar
gjatë përpjekjeve për të ndalur policinë, që po rrënonte kishat dhe kryqet. Ipeshkvi
87 vjeçar, Imzot Zhou, në letrën e tij rrëfen se ka ngelur i befsuar nga fushata e
rrënimit dhe shpjegon se në fillim nuk mori asnjë masë, sepse mendonte se do të përfundonte
shpejt. Ai u kërkon falje besimtarëve për vonesën me të cilën ka reaguar. Politika
e shkatërrimeve – thekson ipeshkvi – është “e gabuar dhe e padrejtë”, sepse janë rrënuar
edhe “ndërtesat brenda normave”. Ipeshkvi vëren se fushata “ka vënë në shënjestër
kryqet mbi çatitë e kishave”, si “shenjë e fesë së krishterë”. Kjo e shton tensionin
ndërmjet Kishës dhe qeverisë, shkakton dhunë, shkatërron harmoninë ndërmjet fesë
dhe shtetit, kërcënon paqen shoqërore. Ipeshkvi njofton se kjo fushatë është gjithnjë
e më e ashpër. Imzot Zhou i fton besimtarët të luten për fatet e dioqezës, duke
kushtuar një Rruzare në ditë dhe Udhën e Kryqit çdo të premte. “Të lutemi – bën thirrje
ipeshkvi i moshuar – që ata të cilët na përndjekin të mund të pendohen”.