SHBA. Kardinali Sandri: pa të krishterë, nuk ka ardhmëri në Lindjen e Mesme
“Nuk do të ketë ardhmëri në Lindjen e Mesme, pa praninë dhe kontributin e të krishterëve”:
kështu u shpreh kardinali Leonardo Sandri, prefekt i Kongregatës për Kishat Lindore,
gjatë Liturgjisë Hyjnore, kremtuar në San Diego të Kalifornisë, në Katedralen e Heparkisë
kaldease. Duke u lutur për të krishterët e persekutuar në Irak, mëmëdheu i Kishës
kaldease, Hirësia e Tij kujtoi edhe ata të Sirisë, të Palestinës, të Egjiptit, e jo
më pak, situatën delikate të greko-katolikëve e të bashkatdhetarëve të tyre, duke
u shprehur afërsinë dhe inkurajimin e Papës për t’u mbështetur fort mbi fenë, pa e
humbur kurrë shpresën. Si citoi, më pas, fjalët e patriakut kaldeas Louis Sako,
kardinali Sandri nënvizoi se duke nisur që sot, për herë të parë në historinë e Irakut,
në Mosul nuk ka më asnjë të krishterë, ndërsa vendi po shkon drejt greminës humanitare,
kulturore e historike. Edhe patriarku maronit Bechara Boutros Rai, shtoi prefekti
i Kongregatës lindore, i nxiti persekutuesit e të krishterëve për dialog, në emër
të humanitetit të përbashkët e duke i ftuar të zgjedhin dialogun, mirëkuptimin, respektin
për tjetrin, në vend të armëve, terrorizmit, dhunës. Asnjë fe, pohoi kardinali
Sandri, nuk mund të pranojë t’i vrasë bijtë e Zotit, në emër të vetë Zotit, duke nënvizuar,
më pas, se të krishterët e botës duhet të jenë zë i të nëpërkëmburve në shoqëri e
t’i mbrojnë pa asnjë ngurim të drejtat e tyre. Prej këndej, ftesa për t’u lutur
në heshtje, jo indiferente, por me forcën e heshtjes së Krishtit në kryq e me dashurinë
e amshuar, nga e cila asgjë nuk mund të na ndajë. Së fundi kardinali Sandri i
përgëzoi meshtarët e shumtë, të pranishëm në liturgji, njëherësh me veprimtarët, korin
dhe rreth një mijë besimtarë, duke u uruar paqe e drejtësi të gjithë atyre, që sot
ndrydhen nën thundrën e hekurt të dhunës pa pikë kuptimi. Gjatë vizitës në Kaliforni,
kardinali Sandri u takua me bashkësinë maronite të Los Anxhelos e të San Diegos si
dhe me atë siro-malabareze. Më pas do të vizitojë armenët e do t’i presë personalisht
priftërinjtë e Kishës sire, kopte, greko-melkite e greko-katolike rumune, që kryejnë
misionin në territor. Diaspora e shumënumërt lindore pret, posaçërisht nga Iraku,
një rritje të ndjeshme, për arsye të ashpërsimit të konfliktit, përfundoi Prelati
i lartë, duke e konsideruar emigracionin sfidë baritore me ngarkesë historike, që
e angazhon përsëri Kishën latine me detyrën e kujdesit për Kishat Lindore.