Françesku: kardinali Marchisano, burrë me fe e kulturë
“Ipeshkëv plot vëmendje ndaj nevojave të besimtarëve, tejet i ndjeshëm ndaj botës
së artit e të kulturës”: Papa Françesku e kujton kështu, kardinalin Francesco Marchisano,
shuar sot paradite, në Romë. I ndjeri, kryeprift nderi i Bazilikës së Shën Pjetrit,
ishte 85 vjeç. Në një telegram ngushëllimi, drejtuar imzot Cesare Nosiglia-s,
kryeipeshkëv i Torinos (kardinali ishte nga Kuneo), Papa Françesku e kujton përzemërsisht
“bariun e dashur, që i shërbeu për shumë vite Selisë Apostolike” I krijuar kardinal
gjatë Koncistorit të 21 tetorit 2003, kreu disa detyra në Kurjen Romake. Ndërmjet
tyre, atë të kryetarit të Komisionit Papnor të Pasurive Kulturore të Kishës e të Komisionit
Papnor të Arkelogjisë Kishtare. Ishte mëkëmbës i përgjithshëm i Shenjtërisë së Tij
për Qytetin e Vatikanit, drejtor i Fabrikës së Shën Pjetrit dhe i Zyrës së Punës së
Selisë Apostolike. “Na lë dëshminë e një jete, shkrirë në përkim fisnik me thirrjen
e tij si meshtar e ipeshkëv”- përfundon telegrami papnor i ngushëllimit. Salikimet,
kryesuar nga Dekani i Kolegjit Kardinalor, do të kremtohen të mërkurën e ardhshme,
më 30 korrik, në orën 08.00 në Bazilikën e Vatikanit. Ati i Shenjtë do të kryesojë
ritin e Porosive të fundme (Ultima Commendatio) e të Lamtumirës (Valedictio). Me
vdekjen e tij Kolegji Kardinalor përbëhet nga 212 kardinaj, nga të cilët, 118 zgjedhës
e 94 jo zgjedhës.