Խամենէի Պաղեստինցիներուն կոչ կ՛ուղղէ շարունակելու Իսրայէլի դէմ զինուորական գործողութիւնները
ԻՐՆԱ կը հաղորդէ, որ Իրանի գերագոյն հոգեւոր պետ այաթոլլա Ալի Խամենէի պաղեստինցի ժողովուրդին
կոչ ուղղած է շարունակելու զինուորական գործողութիւնները Իսրայէլի դէմ եւ ընդլայնել գործողութիւններու
գօտին: «Այդ սիոնական դաժան վարչակարգին դէմ պայքարի միակ միջոցը դիմադրութեան շարունակումն
ու զինուորական գործողութիւններու գօտիի ընդլայնումն է` մինչեւ Յորդանան գետի արեւմտեան
ափը», յայտարարած է ան: Նախապէս Իրանի իշխանութիւնները իսլամական աշխարհին կոչ ուղղած
էին ոչ կրաւորական դիրքորոշում ունենալու Կազայի բնակչութեան օգնելու հարցին մէջ: Նշենք,
որ Համաս շարժումէն աղբիւր մը լիբանանեան «Ախպար» օրաթերթին յայտնեց, որ Համաս շարժումը
պատերազմը ամիսներով շարունակելու կարողութիւնը ունի: Օրաթերթը նաեւ կը հաղորդէ, որ Արաբական
Միացեալ Էմիրութիւնները բժշկական պատուիրակութեան մը ճամբով Կազային նիւթական օժանդակութիւն
ուղարկած է: