Papa në radhë, në mensën e Vatikanit

Vizitë e papritur, sot, e Papës Françesku në mensën e Vatikanit, ku drekojnë nëpunësit e Selisë së Shenjtë. Papa u paraqit si një nga drekuesit e zakonshëm, duke zënë radhën e duke i çuditur të gjithë; posaçe, drejtorin e mensës, Franko Paìni, që flet, me emocion të thellë, në mikrofonin tonë:

Përgjigje: - Po. Papa ishte mysafiri ynë, sot.

Pyetje: - Si u paraqit?

Përgjigje: - Eh… normalisht, si nëpunësi më i përvuajtur. U paraqit këtu, mori tabakanë, lugën, pirunin e thikën, mbajti radhën e i shërbyem. Hëngri makarona të bardha e merluc, sepse sot është e premte, apo jo. Ishte mrekullisht mirë, i rrethuar nga familja e tij e madhe. Tepër mirë. Iu paraqitëm, na pyeti për shëndetin, për punën, na lavdëroi… ishte diçka tejet e mirë. Më fal, po nuk mund të shprehem si duhet, sepse tejet i emocionuar nga kjo e papritur krejt e pazakontë…

Pyetje: - E në fund, ju dha bekimin?

Përgjigje: - Na dha bekimin, bëri foto me ne e u nis e shkoi. Kishte kaluar një orë e tërë…

Pyetje: - Ishte e papritur për juve, apo jo?

Përgjigje: - Krejt e papritur... Rrufe në qiell të kthjelltë. E kush e priste! Papa, që vjen të hajë tek ne?! Eh… Mbetëm të gjithë me gojë hapur nga habia, para kësaj kënaqësie nga më të mëdhatë, që mund të provojë njeriu…