Մատթէոսի աւետարանը մեզի կը նկարագրէ ամենածանօթ եւ ամէնէն գեղեցիկ ու խորհրդանշական
հրաշքներէն մէկը՝ հացերու եւ ձուկերու բազմացումը: Երեկոյ է. ժողովուրդը` զանազան
քաղաքներէն եկած` հիացած մտիկ կ’ընէ Յիսուսի սքանչելի խօսքերուն ու վարդապետութեան, եւ
բուժումներ կը ստանար: Աշակերտները կը մօտենան Քրիստոսի եւ զինքը կը զգուշացնէն ըսելով
թէ ժողովուրդը անօթեցած է եւ պէտք է զանոնք արձակել որպէսզի մերձակայ գիւղերէն ուտելիք
գնեն, որովհետեւ տեղը ուր կը գտնուէին անապատ էր եւ արդէն մութը ինկած է: Յիսուս անոնց
կը պատասխանէ. «Կարիք չ՛ունին երթալու, դուք տուէ՛ք անոնց ուտելիք »: Աշակերտները
կը շուարին, ո՞ւրտեղէն կարելի է հայթայթել այդքան կերակուր ամբողջ ժողովուրդին համար:
Եւ կամ այդ կերակուրը գնելու համար ո՞ւրտեղեն դրամը ապահովել։ Այն ատեն Յիսուս անոնց
կը հարցնէ. «գացէ՛ք, տեսէ՛ք քանի՞ հաց ունիք » (Մարկոս 6.38): Ստուգելէն ետք անոնք ըսին.
«հինգ հաց եւ երկու ձուկ»: Տէր Յիսուս կը հրամայէ, որ ժողովուրդը նստեցնեն խումբ խումբ,
կ’առնէ հինգ հացերը եւ երկու ձուկեըը, աչքերը երկինք կը բարձրացնէ, այսինքն` գոհութիւն
կը մատուցանէ իր Հօր Աստուծոյ, կ’օրհնէ եւ կը յանձնէ աշակերտներուն, որպէսզի բաժնեն:
Ամէնքը կը կշտանան եւ մնացած կտորները կը լեցնեն 12 սակառներու մէջ: Կերողներուն թիւը
հինգ հազար հոգի էին առանց հաշուելու կիներն ու մանուկները: Դէպքը հրաշալի է. Ունի
խորհրդանիշներ. հինգ հացերը կը խորհրդանշեն հրեաներուն առաջին հինգ գիրքերը` հնգամատեան,
իսկ երկու ձուկերը կը խորհրդանշեն Հին եւ Նոր Կտակարանները: Իսկ 12 սակառները կը խորհրդանշեն
հրեաներուն 12 ցեղերը: Հացերու բազմացումին մէջ կը տեսնենք նաեւ Ս. Հաղորդութեան
խորհրդանիշը` կ’առնէ հինգ հացերը, գոհութիւն կու տայ, կ’օրհնէ եւ կը յանձնէ աշակերտներուն,
որպէսզի բաժնեն: Հացերու բացմացումին հրաշքը կը պարունակէ նաեւ ուրիշ պատգամներ
մեզմէ իւրաքանչիւրին համար: Շատ անգամ գործ մը կատարելու ընթացքին, երբ կը հանդիպինք
անյաղթահարելի դժուարութիւններու կը դժուարանանք լուծում գտնելու, Կ’ուզենք այս ինչ գործը
ընել, սակայն դրամ չունինք: Ծրագիրներ կը մշակենք, սակայն աշխատելու համար բաւարար մարդուժ
չկայ: Ընե՛նք, բայց չկայ, մեր կարողութենէն վեր է, եւ կը յուսահատինք: Նոյնն էր աշակերտներու
վիճակը: Տէրը կ’ուզէր իր աշակերտները փորձել եւ սակայն անոնք չէին գիտեր թէ ինչ պէտք
էին ընել: Միայն հինգ հաց եւ երկու ձուկ ունէին: Որո՞ւն կը բաւէր: Անկարելի էր: Յիսուս
ըսաւ. «Հո՛ս բերէք զանոնք» (Մատթէոս 14.18): Եւ անկարելին կարելի դարձաւ: Եթէ կը
մտածենք թէ մեր կատարած գործը Աստուծոյ հաճելի է, ու արդար, այլեւս իրաւունք չունինք
մտածելու, որ տկար ենք, պակասներ ունինք, դրամ չունինք եւ այլն: Եթէ գործը աստուածային
է, չենք կրնար ըսել թէ քիչ բան ունինք եւ չենք կրնար: Դնենք մեր քիչը մեր Տիրոջ Յիսուս
Քրիստոսի առջեւ։ Ան կ’օրհնէ մեր քիչը եւ մեր սահմանափակ կարողութիւնները, եւ այս քիչով
հրաշքներ կը գործէ եւ մեր քիչը ամենուն կը բաւէ ու կ’աւելնայ: Չյուսահատինք դժուարութիւններու
դիմաց, այլ գօտեպնդուինք մտածելով, թէ Տէրը ամենակարող է եւ պիտի օգնէ մեզ: