Konferenca Botërore për SIDA-n. Karitasi: “Të punohet për marrëdhënie bashkëshortore
të qëndrueshme”
Nga 20 deri më 25 korrik në Melburn të Australisë, do të mbahet Konferenca e 20-të
Botërore për Sidën. Do të paraprihet nga dy takime përgatitore – njëri ndërfetar e
tjetri katolik – ku do të ballafaqohen organizata fetare, të impenjuara në asistencën
e të sëmurëve me virusin Hiv. Në këto takime, që do të zhvillohen nesër e pasnesër,
do të marrë pjesë edhe përfaqësuesi i Karitasit Ndërkombëtar për çështjen e Sidës,
don Robert Vitillo: Çdo dy vjet,
Karitasi Ndërkombëtar dhe organizata të tjera katolike organizojnë këto takime para
Konferencës Botërore. Qëllimi është shkëmbimi i përvojës dhe nxjerrja në pah e çështjeve,
të cilat janë vërtet pjesë e identitetit tonë si katolikë. Ne u japim përgjigje të
gjitha problemeve të të sëmurëve me Sidë, nuk marrim masa afatshkurtra, që ndoshta
kanë ndonjë efekt pozitiv, por nuk e trajtojnë njeriun në tërësinë e tij. Kemi shumë
programe të mbështetura nga Karitaset lokale, ndihmojmë të sëmurët ekonomikisht dhe
organizojmë programe për t’u mësuar atyre si ta trajtojnë e si ta përballojnë sëmundjen
vetë. A ekziston vetëdija se për të kundërshtuar përhapjen e Sidës është i
nevojshëm edukimi tërësor i individit? Disa qeveri e disa mjekë janë sensibilizuar
për këtë, sepse fushata e përdorimit të prezervativëve nuk ka sjellë rezultate në
bllokimin e transmetimit të virusit Hiv. Së bashku me Kishën lokale bëjmë shumë në
këtë drejtim: organizojmë programe edukimi, sidomos për të rinjtë, që t’i ndihmojmë
të krijojnë marrëdhënie të shëndosha ndërmjet tyre e të kenë urtinë për të pritur
martesën, pra, një marrëdhënie të qëndrueshme, për të filluar aktivitetin seksual. Edhe
shifrat tregojnë se zgjidhja më e mirë për parandalimin e Sidës është krijimi i marrëdhënieve
të qëndrueshme bashkëshortore… Është shumë interesante. Unë punoj në këtë fushë
që prej mëse 25 vjetësh. Në fillim, kur u flisja ekspertëve të OKB-së për besnikërinë
në martesë, më përgjigjeshin: “Kjo nuk është shkencore”. Unë u thosha që në të vërtetë
është shumë shkencore: nëse bashkëshortët i qëndrojnë besnikë njëri-tjetrit, nuk ekziston
mundësia e transmetimit të virusit. Tani, pak nga pak, edhe qeveritë po fillojnë të
japin mesazhe për abstenimin nga marrëdhëniet e për besnikëri në martesë. Vërtet,
në mbledhjen e fundit të komitetit qeverisës të OKB-së për Sidën, në fillim të korrikut,
u paraqit një deklaratë e qeverive afrikane, ku flitej për nevojën e shoqërimit të
të rinjve në njohjen e vlerave të tyre kulturore dhe fetare. Gjithashtu, nënvizohej
se nuk duhet inkurajuar aktiviteti seksual i parakohshëm për të rinjtë. Shpesh programet
e OKB-së, që parashikojnë përdorimin e prezervativëve, zbatohen, sepse, përndryshe,
nuk do të financoheshin programet e asistencës për të sëmurët me Sidë. Tani, vendet
afrikane po reagojnë dhe kërkojnë ruajtjen e kulturës e të fesë së popujve të tyre.