Кіраўнік дыпламатыі Святога Пасаду: прызнаць каштоўнасць права на перамяшчэнне
Рашэнне праблемы міграцыі
праходзіць праз культурныя і сацыяльныя пераўтварэнні, праз адмову ад “культуры закрыцця”
і пашырэнне “культуры гасціннасці і сустрэчы”, лічыць кардынал Дзяржсакратар Пьетра
Паралін. Ён выступіў 14 ліпеня 2014 г. на семінары па пытаннях міграцыі, які праходзіў
у Мехіка. Галоўнай тэмай форуму быў гуманітарны крызіс, звязаны з дзяцьмі-мігрантамі,
якія вандруюць у адзіночку з Цэнтральнай Амерыкі ў ЗША. Кардынал нагадаў пра цэнтральную
ролю хрысціянства ў прызнанні годнасці і роўнасці кожнага чалавека, створанага на
вобраз і падабенства Бога. Перад сучаснымі грамадствамі стаіць выклік “прызнання каштоўнасці
перамяшчэння чалавека”. Ніхто не можа зачыняцца ў сабе, але павінен быць гатовым прыняць
іншых і служыць ім. На феномен міграцыі не можна адказваць толькі заканадаўчым шляхам,
падкрэсліў ватыканскі дыпламат. Тут патрэбна супрацоўніцтва паміж асобамі, арганізацыямі,
грамадзянскай супольнасцю, установамі і краінамі. У гэтым кантэксце, - адзначыў ён
- Касцёл быў і заўсёды будзе адкрытым супрацоўнікам. Ён звярнуўся да ўладаў Злучаных
Штатаў аказаць дапамогу і абарону дзецям, якія праходзяць мяжу без суправаджэння дарослага,
колькасць якіх расце ў геаметрычнай прагрэсіі.