Propozim i Egjiptit për armëpushim në konfliktin e Gazës
Izraeli pranoi sot propozimin e Egjiptit për armëpushim në konfliktin e Gazës, megjithëse
kryeministri Netanijahu vë si kusht çmilitarizimin e territorit të kontrolluar nga
Hamasi. Ushtria ka marrë urdhër të pezullojë zjarrin, por të qëndrojë në gatishmëri,
pasi organizata palestineze Hamas akoma vazhdon hedhjen e raketave mbi territorin
izraelit, pa e respektuar armëpushimin, që mbështetet edhe nga SHBA-të. Deri tani,
numri i viktimave e ka kaluar 190-shin, ndërsa të plagosurit janë më shumë se 1000
vetë. Sipas organizatës humanitare Oxfam, 70% e të vrarëve janë civilë, 30% e të cilëve,
fëmijë. Mëse 395 mijë vetë në Rripin e Gazës, aktualisht, nuk kanë ujë e u mungojnë
shërbimet higjieniko-shëndetësore. Janë dëmtuar 4 spitale, 3 klinika, një qendër për
invalidët dhe 4 ambulanca. Ndërkaq, vijon
jehona e thirrjes së Papës Françesku, ditën e dielë. Ati i Shenjtë kërkoi të mos kursehen
lutjet e përpjekjet për të ndalur çdo konflikt e për të kthyer paqen në rajon. Të
dëgjojmë një koment të ipeshkvit-ndihmës të Jeruzalemit të Latinëve, imzot Uiliam
Shomali: Janë fjalë të drejta, të cilat përforcojnë mesazhin e paqes, që la
Papa gjatë vizitës në Tokën Shenjte, por edhe gjatë lutjes në Kopshtet e Vatikanit,
më 8 qershor, bashkë me presidentët palestinez e izraelit, si edhe me Patriarkun ortodoks
Bartolomeu. Fjala e tij mbetet në histori e është gjithnjë e vlefshme: të arrish paqen,
pati theksuar, kërkon më shumë përpjekje se të fillosh luftën; e pastaj: aty ku përpjekjet
njerëzore nuk ia dalin dot, ka një mundësi tjetër, lutja. Papa ka besim se Zoti mund
t’i shndërrojë zemrat, sepse problemi është kryesisht vullneti i mirë. Hyji mund t’u
japë vullnetin e mirë zemrave. Papa tha se takimi në Kopshtet e Vatikanit
nuk ishte i kotë: pse? Sepse lutja është gjithnjë e vlefshme. Ne besimtarët
e dimë se lutja e bërë me fe ka fuqi dhe forcë të veçantë. Sidomos, kur njerëzit që
luten janë “armiq” ndërmjet tyre. Jam i sigurtë se lutja e palestinezit Abbas dhe
e izraelitit Peres ishte e sinqertë, sepse duan të dalin nga kjo ëndërr e keqe. Por
nëse rezultati nuk shihet që të nesërmen, nuk do të thotë se nuk ka pasur rezultat. Ka
kaluar një muaj nga ajo lutje: në terren, çfarë ka ndryshuar? Ky problem zgjat
që prej 80 vjetësh, prandaj një vit më shumë, një vit më pak, në një histori kaq të
gjatë, nuk është vonesë. Pema e ullirit, që mbollën së bashku në Kopshtet e Vatikanit,
nuk do të japë fryte para së të mbushen pesë vjet e ky është imazhi i lutjes: mund
të japë fryte më vonë. Cila është gjendja aktuale në Rripin e Gazës? Çfarë
sjell dhuna? Sjell frikë, gjakderdhje, mosbesim e urrejtje. Askush nuk fiton
gjë nga dhuna. Gjendja është dramatike. Famullitari i Gazës ka publikuar një letër,
në të cilën e përshkruan atë. Ka një eksod masiv të familjeve, që largohen si munden
nga Gaza drejt veriut, në Jabaliya, ku janë shkollat e OKB-së. Fëmijët janë të traumatizuar.
Shumë kanë humbur shtëpinë, nuk kanë ushqim, para, ujë, nuk kanë dritë elektrike e
ndodhen gjithnjë nën goditjen e predhave. Bilanci i viktimave tregon se shumica
janë gra e fëmijë…. Bilanci ndryshon çdo ditë, por nuk mund të përshkruhet
me shifra vuajtja.