Patriarku Sako i shkruan parlamentit irakian

Duke qenë se deri më tani mbledhjet e parlamentit irakian për formimin e qeverisë së re nuk kanë çuar në asnjë përfundim, patriarku Lous Raphael Sako u ka drejtuar të gjithë deputetëve një letër-thirrje, me të cilën u kërkon të gjitha forcave politike të mbajnë parasysh se vendi po rrëshqet drejt kaosit dhe nuk duhet humbur kohë.
Patriarku e bashkon “zërin e tij të përvuajtë si përgjegjës i bashkësisë së krishterë” me zërat e kryetarëve shiitë e sunitë, për të kërkuar “përshpejtimin e zgjedhjes së tri kryesive dhe për të shpëtuar vendin nga rreziqet e anarkisë dhe të shpërberjes”.
Kryetari i Kishës kaldease u propozon anëtarëve të parlamentit edhe teksin e një lutjeje, të shkurtër, por të ngjeshur, e cila mund të lexohet në fillim të mbledhjeve të asamblesë së përgjithshme. Lutja thotë kështu: “O Hyj, na ndihmo që të mund të dialogojmë me njëri-tjetrin dhe të mund ta kuptojmë njëri-tjetrin, që t’i zgjidhim mosmarrëveshjet mes nesh e të qëndrojmë larg nga çdo mbyllje dhe sektarizëm. O Hyj, na ndihmo të përhapim paqen dhe qetësinë në popullin tonë, në mënyrë që Iraku të mund të dalë fitimtar nga të gjitha problemet. Amen”.