«Լիբանանը հանրապետութեան նախագահէ մը զրկելու քայլը դարձած է անընդունելի» Շեշտեց Ռայի
Պատրիարքը
Մարոնի համայնքի Պշարա Ռայի պատրիարքը երէկ Տիմանի մէջ նախագահեց կիրակի օրուան պատարագին,
որուն ընթացքին արտասանած իր քարոզին մէջ շեշտեց, որ անկարելի է ընդունիլ, որ Լիբանանի
կացութիւնը այս ձեւով շարունակուի եւ անոր զլացուի հանրապետութեան նոր նախագահ մը ունենալու
իրաւունքը: «Սահմանադրութիւնը կամ լիբանանեան Ազգային ուխտը խախտելու որեւէ պատճառաբանութիւն
խիստ մերժելի է», ըսաւ Ռայի պատրիարքը` հարց տալով, որ խորհրդարանը մինչեւ ե՞րբ պիտի
շարունակէ թերանալ օրէնսդրական իր պարտականութեան մէջ: Միւս կողմէ, ընկերային հարցերու
նախարար Ռաշիտ Տըրպաս շաբաթավերջին այցելեց Տիման, ուր հանդիպում մը ունեցաւ Ռայի պատրիարքին
հետ: Հանդիպումէն ետք Տըրպաս շեշտեց, որ Թրիփոլիի մէջ պատահածը մտահոգիչ է` աւելցնելով,
որ հիւսիսային Լիբանանի մայրաքաղաքին մէջ պատահածը շինծու է եւ այս կամ այն քաղաքական
կողմին դրդումներով է, որ կը պատահի: Տըրպաս հաստատեց սակայն, որ կառավարութիւնը Թրիփոլիի
եւ ամբողջ Լիբանանի տարածքին իր հակակշիռը պիտի պահէ: Տըրպաս յայտնեց նաեւ, որ Ռայի
պատրիարքին հետ քննարկած է Լիբանան հասնող սուրիացի գաղթականներուն թղթածրարը: Ռայի
պատրիարքին այցելուներէն եղաւ նաեւ նախկին նախարար Ժան Օպէյտ: