Videomesazh i Françeskut të sëmurëve dhe personelit të Gemelli-t
“Dëshmojeni se vetëm Zoti është forca juaj”. Është kjo ftesa e Papës drejtuar të sëmurëve
dhe personelit të Poliklinikës Gemelli, përmes një videomesazhi, pas anulimit të vizitës
së tij, parashikuar për 27 qershorin e kaluar. Të sëmurët, pohon Ati i Shenjtë, mund
të dëshmojnë se pasuria më e çmuar e jetës është Ungjilli, nuk janë paratë, as pushteti.
Papa kujton
se pushimet verore janë çast prehjeje, por edhe rast për të ndenjur më gjatë në shoqëri
me Jezusin, duke rilexuar, për shembull, disa faqe të Ungjillit. Pikërisht nga veronjësit
niset mendimi i Papës, për të shkuar pastaj, menjëherë, tek të sëmurët e pleqtë…: “…
që ndjehen më të vetmuar e kanë më shumë vështirësi për disa shërbime të domosdoshme,
sidomos në qytetet e mëdha. Kështu koha e pushimeve është edhe kohë, në të cilën duket
se vështirësitë e jetës bëhen më të forta”. Të sëmurëve, pastaj, në qendër
të vëmendjes në videomesazh, Papa u shpreh keqardhjen që s’mundi të jetë mes tyre
më 27 qershor, për t’i takuar personalisht: “Mendoj për ju, të sëmurë, që mjekoheni
me dashuri e profesionalitet nga personeli mjekësor e paramjekësor i Gemelli-t: kultivojeni
në lutje shijen e sendeve të Zotit, dëshmojeni se vetëm Zoti është forca juaj. Ju,
të sëmurë, që provoni brishtësinë e trupit, mund t’u dëshmoni me forcë njerëzve, pranë
jush, se pasuria më e çmuar e jetës është Ungjilli, dashuria përdëllyese e Atit e
jo paratë e pushteti. Në të vërtetë, edhe kur një njeri, në logjikën e botës, është
i rëndësishëm, nuk mund t’i shtojë as edhe një çast të vetëm jetës, kur i sosen ditët”.
Duke
shprehur edhe një herë keqardhjen për mungesën mes të sëmurëve dhe personelit mjekësor,
që e prisnin vizitën e tij, Papa kujton se shpesh jeta nuk na lejon t’i plotësojmë
dëshirat e se duhet ta pranojmë brishtësinë tonë.