Kardinal Maradiaga: emigrantët, burim për zhvillimin njerëzor
“Dy të tretat e lojtarëve të futbollit gjatë këtij Kampionati Botëror, ishin emigrantë”.
Ndërsa pritet të merret vesh kush është kampioni i botës për këtë vit, në ndeshjen
e fundit që zhvillohet sot, kujtojmë fjalët e kryetarit të Caritas Internationalis,
kardinalit Oscar Rodriguez Maradiaga, në Konferencën për emigracionin, që u zhvillua
javën e kaluar në Uashington. Është fjala për takimin e organizuar çdo pesë vjet nga
Konferenca Ipeshkvnore e SHBA-ve, së bashku me Karitasin dhe me Rrjetin ligjor katolik
për emigracionin. “Kur dëgjoj histori emigrantësh, që ndërmarrin udhëtime prej
qindra mijëra kilometrash, i admiroj për guximin dhe vendosmërinë”, nënvizoi prelati,
duke përmendur edhe frikën e traumat, që pësojnë emigrantët në këto rrugë drejt shpresës.
“Emigrantët janë subjekte abuzimesh, shfrytëzimi e dhune. Fëmijët përfundojnë në duart
e trafikantëve të drogës, të organizatave kriminale e të trafikut të njerëzve, përveçse
në duart e zyrtarëve të korruptuar. E megjithatë, duket se nuk janë ata, që frikësohen
më shumë: ‘Kur shoh si reagon bashkësia ndërkombëtare para krizës së emigracionit,
pyes veten cili ka më shumë frikë: emigrantët, apo vendet për ku janë drejtuar?”,
vuri në dukje me ironi kardinali Maradiaga. E shpesh, vendet për ku janë drejtuar,
i fusin në burg, nuk kujdesen për ta, i nxjerrin jashtë kufijve, i pengojnë të fillojnë
një jetë të re. “Imagjinoni – bëri një krahasim kreu i Karitasit Ndërkombëtar – Shën
Palin Apostull në përpjekje për të hyrë sot në Evropë: do të ishte klasifikuar klandestin
dhe si i tillë, do të ishte kthyer mbrapsht në shtëpi”. Prelati falenderoi agjencitë
katolike ndërkombëtare dhe amerikane për punën e bërë në favor të emigrantëve, ndërsa
ftoi administratën amerikane të ratifikojë Konventën për të Drejtat e Fëmijëve, duke
ngulur këmbë në rëndësinë e edukimit: “Garantimi i të drejtave të fëmijëve emigrantë
– tha ai – është hapi i fundit, por duhet të punojmë edhe për të siguruar zhvillimin
e gjithanshëm të njeriut, përmes arsimit, formimit dhe ushqimit shpirtëror”. Emigracioni,
ishte mendimi i kardinalit Maradiaga, është pjesë e zhvillimit njerëzor. Emigrantët
sjellin aftësi dhe krahë pune, prandaj përbëjnë pasuri. Së fundi, duke cituar Papën
Françesku, që e ka quajtur trafikun e njerëzve “krim kundër njerëzimit”, prelati theksoi
rëndësinë e ligjeve kundër kësaj plage shoqërore. Konferenca amerikane për emigracionin
diskutoi jo vetëm problemin e emigrantëve ekonomike, por edhe atë të refugjatëve,
të të miturve të pashoqëruar, të viktimave të trafikut. Qëllimi është nxitja e Kongresit
amerikan për të miratuar reformën e emigracionit brenda vitit. Delikate, gjendja e
të miturve të pashoqëruar. Vetëm gjatë 8 muajve të fundit, janë ndaluar 52 mijë të
mitur, ardhur nga Guatemala, El Salvadori dhe Hondurasi.