Nunci në Jeruzalem: të nevojshme, gjeste të forta për paqen
Shqetësuese, situata në Lindjen e Mesme. Ka arritur në 100, numri i palestinezëve
të vrarë. Ndërmjet tyre, shumë fëmijë. Ky, bilanci i tri ditëve të sulmit me raketa
izraelite mbi Gazën, ndërsa vijon përgjigjja me të njëjtën gjuhë, në drejtim të Shtetit
hebraik. Hidhet poshtë hamendja për armëpushim të mundshëm. Dje, takimi i OKB-së,
pa rezultate të prekshme. “Duhen bërë gjeste të guximshme për paqen” pohon, në
mikrofonin tonë, nunci apostolik në Izrael, imzot Lazzarotto:
Dje pasdite, në
orën 16.00, Këshilli i Sigurimit i OKB-së, me kërkesën e Lidhjes Arabe, diskutoi për
shkallëzimin e dhunës ndërmjet izraelitëve e palestinezëve në Rripin e Gazës. Ndeshja
ka shkaktuar rreth 100 viktima e, vetëm parmbrëmë, në zonën e Khan Yunis, mbetën të
vrarë 5 fëmijë, ndërsa 550 vetë u plagosën. Izraeli njofton se në më pak se tri ditë
nga Gaza janë nisur drejtim të kufijve hebraikë, 365 raketa; një, për çdo dhjetë minuta.
Disa kanë rënë pranë centralit bërthamor të Dimonës, të tjera, me rreze të gjatë,
para Haifës. Në Jabaliya, tre vetë gjetën vdekjen, të goditur nga një raketë izraelite.
Ndërkaq Egjipti ka hapur qafën e Rafah për të lehtësuar kalimin e të plagosurve. Ndërsa
diplomacia ndërkombëtare punon për ndalimin e zjarrit, hamendja e armëpushimit hidhet
poshtë nga kryeministri izraelit. “Armëpushimi me Hamasin, pohoi Netanyahu para komisionit
të punëve të jashtme të Parlamentit, nuk është në rendin e ditës”. Izraeli siguron
se në Rripin e Gazës nuk do të ndërpriten furnizimi me energji elektrike dhe uji.
Por kjo nuk e përjashton rrezikun e një sulmi të mundshëm nga toka, ndërsa presidenti
palestinez, Abu Mazen, flet për genocid. Sot paradite në Tel Aviv ranë përsëri sirenat,
në çastin kur nga Rripi niseshin 100 raketa. Shumë i shqetësuar, edhe nunci apostolik
në Izrael, delegat apostolik në Jeruzalem e Palestinë, imzot Giuseppe Lazzarotto,
në mikrofonin tonë:
Përgjigje: - Nuk ka dyshim se çasti, që po jetojmë,
është i ngarkuar me shqetësim të madh, sepse ajo që ndodhi këto ditë e ngatërron më
tej një situatë, të shqetë në vetvete. Ndjehet nevoja e gjykimit të shëndoshë si
nga njëra anë, ashtu edhe nga ana tjetër. Të gjithë duhet ta kuptojnë se gjithçka
ka kufi. E kam fjalën kryesisht për politikanët, për ata, që duhet të marrin vendime.
Nga ana tjetër, duhet pasur edhe guxim, siç ka thënë Ati i Shenjtë në disa raste e
si vijon ta përsërisë: paqja ka nevojë për gjeste guximtare, përndryshe vështirë se
zhbllokohet situata e konfliktit, që është vërtet në rrezik të degjenerojë.
Pyetje:
- Deklaratat e këtyre orëve janë tejet shqetësuese…
Përgjigje: -
Çast shqetësimi të madh, ky, sepse është mbushur kupa e në se vijon kështu, edhe do
të derdhet. Nuk duhet kapërcyer kufiri, përndryshe do të jetë tejet i vështirë kthimi
mbrapa. Shpresoj se do të ketë shumë vetëdije e edhe shumë ndjesi përgjegjësie nga
njëra e nga tjetra palë. Duhet të impenjohemi të gjithë. E përsëris shpesh: këtu ka
shumë njerëz vullnetmirë, që e duan paqen. E duan e impenjohen edhe me gjeste konkrete,
praktike, si na ka mësuar e vijon të na mësojë Papa Françesku. Si gjesti i madh, që
bëri, duke ftuar dy presidentët për t’u lutur së bashku, për të reflektuar së bashku,
për të dhënë një mesazh të fortë. Nuk duhet të mendojmë se kjo ngjarje e freskët u
harrua kaq shpejt e se nuk shërbeu për asgjë. Nuk është e vërtetë! Ishin gjeste të
forta, mesazhe të forta, që u përhapën në mbarë botën. Prandaj duhen pasur mirë parasysh
e duhet të shërbejnë si pikë referimi, sepse është pikërisht kjo, rruga ku duhet ecur.
Pyetje: - Ç’mbetet nga ky takim lutjeje?
Përgjigje: -
Mbetet admirimi i madh e nderimi i madh për atë që bënë Papa me dy presidentët, së
bashku. Mbetet gjesti, që tregon rrugën ku duhet ecur me guxim, edhe pse ajo që po
ndodh të duket sikur synon ta shlyejë këtë ngjarje. Nuk është e vërtetë! Nuk duhet
të lëshohemi në krahët e pesimizmit e ta lëmë këtë vorbull të tmerrshme dhune, që
lind dhunë e konflikte, të na marrë me vete. Besimtarët duhet të kapen fort pas forcës
së lutjes.
Pyetje: - Si vepron nunciatura në këtë çast të vështirë me
palët izraelite e palestineze?
Përgjigje: - Nunciatura vijon programin
e saj normal. Posaçërisht me shumë kontakte, që përpiqem t’i mbaj, natyrisht si me
njërën, ashtu edhe me tjetrën palë, në nivele të ndryshme. Takohemi me bashkësitë
tona, me drejtuesit e bashkësive fetare, me njerëz të veçantë e edhe me palën politike,
duke vijuar kontaktet tona normale me qeverinë. Përpiqemi gjithnjë të inkurajojmë
dialogun, mirëkuptimin, të flasim për rrugëzgjidhje, për kërkimin e një udhe paqësore,
që i jep fund konfliktit.
Por, a ka rrezik real që në Lindjen e Mesme të shpërthejë
lufta, në kuptimin e mirëfilltë të kësaj fjale? Përgjigjen ia kërkuam Antonio Ferrarit,
i dërguar i posaçëm i gazetës italiane “Corriere della Sera”:
Përgjigje:
- Rreziku është shumë i madh, edhe pse besoj të jetë hera e parë që situata duket
se po del dore. Dikur mund të besohej akoma mbi forcën e arsyes: sot jemi para rrezikut
që arsyes t’ia zënë vendin pasionet, nga të dyja palët, e posaçërisht nga ana e Hamasit.
Rreziku që gjithçka të rëndohet deri në atë pikë, sa të shkaktojë të pandreqshmen,
është më se i prekshëm.
Pyetje: - Fakti se në krahasim me Intifadën
e Parë e të Dytë, niveli i dhunës është shumë më i lartë, me sulme ajrore kundër raketave,
mund të shkaktojë në bashkësinë ndërkombëtare një farë frike edhe në nivel diplomatik
lidhur me mundësinë e ndërhyrjes… Përgjigje: -Sot situata është
pakëz më e ndërlikuar, në krahasim me të kaluarën: me SHBA-të, që nuk kanë shumë dëshirë
të ngatërrohen në një gjeratore të re tensioni në Lindjen e Mesme. Por unë besoj se
nuk duhet tepruar: Abu Mazen foli për genocid, e të flasësh për genocid kundër Izraelit,
më duket fjalë pa vend. Përpjestimet mund të kalojnë nga dhuna, në masakër, për shkak
të marrëzisë së njërës palë e përgjigjes së dhunshme të tjetrës. Tani, mbi bazën e
gjithsa po ndodh, nuk mund të mos mendoj për mundësinë e një pike kontakti ndërmjet
ekstremizmit të Gazës e ngjarjeve jo larg kufijve të Izraelit, posaçërisht në Siri
e Irak, ku po veprojnë forca, që bëjnë masakra sistematike mbi civilët, të ashtuquajtur
‘armiq’. Besoj se të gjitha këto ngjarje, në një farë mënyre, nuk mund të mos jenë
të lidhura. Prej këndej, besoj edhe se Bashkësia ndërkombëtare duhet t’i thotë “ndal!”
gjithë këtij pështjellimi e të mos rrijë në heshtje, ashtu si po hesht edhe pala amerikane.