Sulme izraelite e raketa palestineze: mëse 70 viktima

Rritet shqetësimi ndërkombëtar për zhvillimet dramatike të krizës izraelito-palestineze. Edhe dje, sulme të reja ajrore të forcave hebraike mbi Rripin e Gazës, ndërsa palestinezët qëllonin me raketa territorin izraelit. Dhjetra, viktimat palestineze: mëse 70 të vdekur e rreth 450 të plagosur. Ndërkaq, bashkësia ndërkombëtare impenjohet më shumë për të ndalur dhunën e për ta penguar Izraelin të fillojë sulmin nga toka.
Presidenti i Autoritetit Palestinez, Mahmud Abas foli për masakër e genocid dhe kërkoi ndëhmë e mbrojtje nga organizatat ndërkombëtare. Në Gazë, zëdhënësi i Hamasit e kërcënon Izraelin se do të vijnë kohë të vështira për të. Nga ana e tyre, presidenti izraelit Peresh dhe kryeministri Netanijahu paralajmërojnë se do të fillojë operacioni nga toka nëse palestinezët nuk rreshtin së gjuajturi me raketa (234 në dy ditë). Përkrahen menjëherë nga SHBA-të, Gjermania, Britania e Madhe dhe Franca.
Ndërkaq, vendet arabe e myslimane, në veçanti, Egjipti, Jordania dhe Turqia, kërkojnë të ndalen menjëherë sulmet izraelite, gjithsej 590, në këto dy ditë. Presidenti egjiptian jep urdhër të hapet kufiri me Gazën, për kalimin e të plagosurve. Edhe diplomacia ndërkombëtare intensifikon impenjimin. Sekretari i Përgjithshëm i OKB-së, Ban Ki-Mun, ka folur në telefon me udhëheqës perëndimorë e arabë, duke i paralajmëruar se gjendja mund të dalë jashtë kontrollit. Një luftë tjetër do të ishte katastrofike për rajonin. Ban Ki-Mun mblodhi sot Këshillin e Sigurimit të OKB-së.
Për këtë shkallëzim tragjik të dhunës, folëm me atë Pierbattista Pizzaball-ën, Rojtar i Tokës Shenjte:

Përgjigje: - Është tragjedi! Urojmë edhe një herë të fitojë gjykimi i shëndoshë, të dalë ndonjë nga liderët e të kërkojë fundin e këtij shkallëzimi, e edhe ta frenojë, sepse sa më shumë të pritet, aq më vështirë do të jetë të bllokohet kjo gjeratore dhune.

Pyetje: - E pra si palestinezët, ashtu edhe izraelitët, e dënuan dhunën, e sidomos, i dënuan ashpër të dyja vrasjet: atë të të rinjve hebrenj një herë e, më pas, atë të të riut palestinez. Mund të themi, prandaj, se nga poshtë pati dënim të fuqishëm, e megjithatë, nuk mjaftoi…

Përgjigje: - Po, e kjo na bëri të shpresojmë se dënimi i njëzëshëm do t’i vinte një pritë të pakapërcyeshme këtij shkallëzimi; ndërsa ata, që i fryjnë zjarrit të urrejtjes, me sa duket, në këtë çast janë më të organizuar e edhe më të mirëpajisur për të ndikuar mbi opinionin publik. Megjithatë urojmë përsëri të fitojë gjykimi i shëndoshë. E di mirë se këto fjalë tingëllojnë pakëz larg nga realiteti, por ç’të themi? Nuk e di ç’mund të thuash në çaste të tilla. S’të mbetet tjetër, veçse të lutesh. Është e vetmja gjë, që mund të bëjmë. E që ka vërtet rëndësi, pas lutjes në Vatikan. Ka rëndësi që drejtuesit e tri feve kryesore të takohen e të bëjnë që të gjithë ta shohin edhe faqen tjetër të Tokës Shenjte, e cila nuk është vetëm faqe dhune. Sot, më shumë se kurrë, ka rëndësi të bëjmë gjeste paqësore, larg çdo tipi të dhunës.

Pyetje: - Lidhja Arabe që dje i bëri thirrje Këshillit të Sigurimit të OKB-së. Ç’mund të na thoni për hapat e mundshme?
Përgjigje: - OKB-ja, Bashkimi Evropian, Lidhja Arabe, janë të gjitha organizma që, për fat të keq, kanë ndikim të paktë mbi vendimet që merren në Tokën Shenjte.