Հայկական տօնացոյցի եօթնեկական դրութեան համաձայն, սուրբերու տօները կը կատարուին Երկուշաբթի,
Երեքշաբթի, Հինգշաբթի եւ Շաբաթ օրերը: Հայ տօնացոյցին մէջ Սուրբերու տօներուն հարիւր
քսաներկու օրեր յատկացուած են: Այս պատճառաւ, յաճախ, բազմաթիւ սուրբեր միասին կը տօնուին:
Սուրբերը չեն տօնուիր Կիրակի օրերը, որոնք Տէրունական են, ինչպէս նաեւ Չորեքշաբթի եւ
Ուրբաթ օրերը, որոնք Պահոց օրեր են: Յառաջիկայ Հինգշաբթի 10 Յուլիս 2014-ին, Հայ Եկեղեցին
կը տօնախմբէ Սրբոց Թարգմանչացն Սահակայ և Մեսրոպայ յիշատակը: Հայ դպութեան պատմութիւնը
կ'աւանդէ, թէ Սուրբն Սահակ և Մեսրոպ՝ հայ գիրերուն գիւտը կատարելէ անմիջապէս ետք՝ հետամուտ
եղան աշակերտներ հաւաքելու և զանոնք կրթելու. Հայոց լեզուն սորվեցնելու, և զանոնք հայ
ազգին ծառայութեան պատրաստելու: Այս աշակերտները մեզի ծանօթ են՝ Երէց և Կրտսեր Թարգմանիչներ
անունով: Թարգմանչաց ժամանակը իրաւամբ Հայ ժողովուրդի ոսկեդարը կը համարուի: Ազգերու
պատմութեան մէջ նման դէպք մը փնտռել՝ ընդունայն է. ինչպէս նաեւ Թարգմանչաց ջանքով եղած
քիչ ժամանակուան մէջ՝ այնչափ ինքնագիր երկասիրութիւն և ընտիր լեզուով բազմապատիկ թարգմանութիւններ
դժուար է գտնել: Ս. Սահակ Հայրապետ, վերջին շառաւիղը Լուսաւորչեան նուիրական տոհմին,
երբ (387-436) Հայրապետական Աթոռը բազմեցաւ, ինքզինք բոլորովին Աստուծոյ և ազգին բարւոյն
ընծայեց: Ան մէկ կողմէ իր կեանքը աղօթքով և ճգնութեամբ անցուց, և միւս կողմանէ իրեն արժանի
աշակերտներ համախմբեց, ինքզինք նուիրելով անոնց հոգեւոր և մտաւոր յառաջդիմութեան: Սուրբն
Մեսրոպ Մաշտոց Վարդապետը (360-440) միացաւ Ս. Սահակ Հայրապետին, և Վռամշապուհ Արքայի
աջակցութեամբ՝ հայերէն մատենագրութեան ոսկեդարին հիմը դրեցին: Անոնց փութաջան աշխատանքով՝
հայերէն գրոց գիւտը տեղի ունեցաւ: Ապա անոնք բացին այլ և այլ վարժարաններ՝ Հայաստանի
պատանիներն ու երիտասարդները կրթելու: Միաժամանակ, այս երկու Հայրերուն ձեռքովը կատարուեցաւ
Աստուածաշունչ գրոց թարգմանութիւնը և ազգային եկեղեցական ծիսական գիրքեր պատրաստուեցան,
միանգամայն այլ և այլ աղօթքներու թարգմանութեամբ կամ ինքնագիր յօրինմամբ