Transparencë dhe racionalizim i shpenzimeve: fjalët kyçe në kuadrin e ri ekonomik
të Selisë së Shenjtë
Transparencë dhe racionalizim i shpenzimeve: këto janë fjalët kyçe në kuadrin e ri
ekonomik të Vatikanit. E në to u përqendrua edhe konferenca e sotme për shtyp, gjatë
së cilës Prefekti i Sekretarisë për Ekonominë, kardinali George Pell, njoftoi nisma
të reja e të rëndësishme për përmirësimin e administrimit ekonomik të Selisë së Shenjtë
dhe të Qytet-Shtetit të Vatikanit. Këto ndryshime, filluar nga Sekretaria e re për
Ekonominë, konsiderohen themelore për të përballuar dobësitë e së kaluarës e për të
krijuar një platformë më të mirë në të ardhmen. Ato janë miratuar nga Këshilli për
Ekonominë dhe Këshilli i 8 kardinajve, në mbledhjet e tyre të fillimit të korrikut,
si edhe nga Ati i Shenjtë. Objektivi është racionalizimi i kostove, por edhe i funksioneve,
duke ruajtur rezultatet e larta, nënvizoi kardinali Pell: "Para së gjithash,
po punojmë mbi standartet financiare ndërkombëtare, që duhet të ndiqen nga të gjitha
dikasteret dhe seksionet e Selisë së Shenjtë dhe Governatoratit. Për momentin, jemi
në fazën, në të cilën tregohen qartë drejtimet dhe objektivat, që duam të arrijmë.
Kur themi këtë, nënkuptojmë transparencën e plotë. Do të realizohen raporte vjetore
e ato do të hartohen nga jashtë”. Në shtator 2014, Sekretaria për Ekonominë
do të fillojë përgatitjen e buxhetit për vitin 2015. Ndryshimet kryesore në kursin
e ri ekonomik kanë të bëjnë me APSA-n(Administrimi i Pasurisë së Selisë Apostolike),
me Fondin e pensioneve, me mediat e Vatikanit dhe me IOR-in. Përsa u përket mediave
të Vatikanit, ndër të cilat edhe radioja jonë, do të bëhen përpjekje për të kursyer,
nënvizoi kardinali Pell, por “pa sakrifikuar gamën e pranisë informative”. Qëllimi
kryesor mbetet mbërritja e mesazhit të Papës e të Kishës tek një numër gjithnjë e
më i madh katolikësh. Në këtë këndvështrim, marrin rëndësi të madhe mediat digjitale.
Ndryshim tjetër kyç përfshin IOR-in (Instituti për Veprat Fetare), apo banka
e Vatikanit, siç njihet. Është emëruar presidenti i ri, francezi Jean-Baptiste de
Franssu, i cili e quajti “nder të madh të thirresh për të zbatuar ndryshimet, të nevojshme
sot për ta shndërruar më tej IOR-in në një furnizues të përkushtuar shërbimesh për
Kishën”. E pyetjes se kur do të fillojë zbatimi i strategjisë së re e puna e grupit
të ri në krye të IOR-it, iu përgjigj: “Nuk do të ndodhë nesër, do të na duhen
të paktën dy muaj. Do të fillojmë nga IOR-i, me kujdes më të madh për klientët aktualë,
për ta zgjeruar pastaj punën tonë në të gjithë pasuritë e Selisë së Shenjtë. Prandaj,
është shpejt për të caktuar një datë, por mund të them se strategjia e re do të zbatohet
në 24 muajt e ardhshëm”. U diskutua edhe problemi i pensioneve. Të dëgjojmë
zv.koordinatorin e Këshillit për Ekonominë, Joseph Zahra: “Pensionet, që u
paguhen sot të gjithë punonjësve të Selisë së Shenjtë e të Governatoratit, si edhe
ato për pensionistët e brezave të ardhshëm, do të jenë të garantuara. E dimë ç’po
ndodh në vendet e tjera perëndimore – dhe e nënvizoj këtë pikë, sepse e kam parë vetë
situatën në këto vende: shumë prej tyre, gjatë viteve të fundit, po përballojnë beteja
jo të vogla në kuadrin e sistemit të pensioneve. E kam ndjekur edhe gjendjen italiane,
e cila përbën një prej problemeve kryesore në diskutimet tona”. Së fundi APSA
(Administrimi i Pasurisë së Selisë apostolike), një pjesë e së cilës do të transferohet
në Sekretarinë për Ekonominë, ndërsa pjesa tjetër do të luajë rolin e Thesarit të
Selisë së Shenjtë dhe të Qytet-Shtetit të Vatikanit, pra do të shndërrohet në një
lloj Banke Qendrore.