Imzot Tomasi: Refugjatët subjekt i së drejtës, jo vetëm objekt ndihmash
Refugjatët dhe të shpërngulurit janë subjekt i të drejtave dhe detyrimeve, si të gjitha
qeniet e tjera njerëzore, jo vetëm objekt ndihme”. Kështu u shpreh Vëzhguesi i përhershëm
i Selisë së Shenjtë pranë OKB-së në Gjenevë, në fjalën e mbjatur me rastin e seancës
së 60-të të Komitetit të përhershëm të Komisariatit të lartë të OKB-së për regugjatët.
Pasi kujtoi se aktualisht në botë ka më se 50 milionë vetë në arrati nga shtëpitë
e tyre – shifra më e lartë pas Luftës së Dytë botërore – prelati nguli këmbë tek nevoja
për të mbrojtur “respektimin e të drejtave dhe të dinjitetit të njeriut”, sepse “mbrojtja
e njerëzve duhet të ketë përparësi kundrejt shqetësimeve të tepruara në lidhje me
sigurinë e shtetit”. Imzot Tomasi bën thirrje të mos mendohet se mikpritja është
diçka e kufizuar brenda “sferës private”, përkundrazi, duhet të jetë “pjesë e botës
politike, në mënyrë që gjendja të ndryshojë në nivel kombëtar dhe global”. Tema e
refugjatëve, vijoi Vëzhguesi i përhershëm, duhet përballuar me “politika kufitare
më të zbutura, me procedura më të lehta për marrjen e azilit, me mundësi më të mëdha
për kthimin e të shpërngulurve në shtëpitë e tyre”. Veçanërisht në Evropë është “thelbësore
një strategji e përbashkët, në mënyrë që vendet, të cilat shërbejnë si destinacion
i parë” për refugjatët, të mos lihen vetëm, por të punohet “për një marrëveshje për
shpërndarjen e të shpërngulurve në vende të ndryshme, duke mbajtur parasysh gjendejen
ekonomike të secilit vend dhe dendësinë e popullsive të ndryshme”. Duke uruar,
më tej, që opinioni publik të edukohet dhe të vetëdijësohet në lidhje me përgjegjësitë
e përbashkëta dhe shkaqet e konflikteve, si edhe me kërkimin e zgjidhjeve paqësore”,
prelati theksoi rolin që duhet të luajnë bashkësitë fetare, thirrjen e tyre për të
“përçuar mesazhin e mëshirës dhe të solidaritetit”, ndihmën që mund të japin me qëllim
që “emigrimet e detyrueshme të vështrohen nga një kënd më i gjerë”, “gjithëpërfshirës,
koherent dhe përbashkues”, në optikën e “respektit për jetën dhe për dinjitetin njerëzor”,
për të zhdukur, kështu, shkaqet e thella të këtyre vuajtjeve”.