U paraqitën në Krakov logoja dhe lutja zyrtare e DBR-së
Në Krakov, kardinali Stanislau Dgjivish paraqiti logon dhe lutjen zyrtare të Ditës
së 31-të Botërore të Rinisë, që do të kremtohet në qytetin polak, në vitin 2016. Simbolizmi
i logos përfshin shumë elemente të DBR-së, tema e së cilës është shkëputur nga Ungjilli
sipas Mateut: “Lum të mëshirshmit, sepse do të gjejnë mëshirë”. Në qendër është
kryqi, domethënë Krishti, zemra e Ditëve Botërore të Rinisë. Nga Kryqi shpërthejnë
dy shkëndija, një e kuqe e një e blu në të kaltër. Simbolizojnë rrezet e Mëshirës
Hyjnore, gjakun e ujin, që gurruan nga kraharori i Krishtit, si i shikojmë në figurën
realizuar sipas rrëfimit të Shën Faustinës Kowalska. Rrezet ngatërrohen me krahët
e një të riu të stilizuar, që rrok Kryqin. Logoja ngërthehet në një stemë me formën
e Polonisë. Koka e të riut tregon edhe pozitën gjeografike të Krakovit, ndërsa ngjyrat
e përdorura: blu, e kuqe e verdhë, të kujtojnë ngjyrat zyrtare të qytetit.
Lutja
zyrtare e DBR-së ka tri pjesë: E para, ia beson çdo njeri, posaçërisht
të rinjtë, Mëshirës Hyjnore. Në pjesën e dytë, i lypet Zotit hiri i një
zemre të mëshirshme. Në të tretën, kërkohet ndërmjetësimi i Virgjërës Mari
e i Shën Gjon Palit II, pajtor i DBR-së. Logo u krijua nga Monika Rybczynska, një
e re polake, 28 vjeçe, e diplomuar në shkencat e komunikimit, në Universitetin e Varshavës:
e vizatoi logon në Vatikan, menjëherë pas shenjtërimit të Gjon Palit II, si shprehje
e falënderimit për ndërmjetësimin në jetën e saj profesionale. Një e re tjetër, grafiste
polake, Emilia Pyza, 26 vjeçe, bashkëpunoi në fazën e përsosjes së logos.