Իսրայէլեան ոստիկանութիւնը չորեքշաբթի, 2 յուլիսին, Արեւելեան Երուսաղէմի մէջ յայտնաբերեց
դիակը պաղեստինցի պատանիի մը, որ հազիւ քանի մը ժամ առաջ առեւանգուած էր: Ականատեսներ
տեսած էին, որ 17-ամեայ Մոհամետ Ապու Խտէյրը բռնի ինքնաշարժին մէջ կը դնեն: Քանի մը ժամ
ետք անոր մասամբ հրկիզուած դիակը յայտնաբերուեցաւ անտառի մը մէջ: Իսրայէլեան ոստիկանութիւնը
անկարող եղաւ հաստատելու սպանութեան դրդապատճառը, սակայն պաղեստինեան աղբիւրներ ըսին,
որ կը թուի, թէ իսրայէլացի պատանիներու սպանութեան վրէժը լուծելու համար կատարուած է
անիկա: Երեքշաբթի գիշեր տասնեակներով իսրայէլացիներ Երուսաղէմի մէջ բողոքի ցոյց կատարեցին
ընդդէմ երեք իսրայէլացի պատանիներու սպանութեան: Ցուցարարները «մահ արաբներուն» բացագանչեցին: Հետագային
պատանիին տան մօտ պաղեստինցիներու եւ իսրայէլեան ոստիկանութեան միջեւ բուռն բախումներ
տեղի ունեցան: Ցուցարարները քարեր նետեցին, իսկ ոստիկանները արցունքաբեր կազ օգտագործեցին,
ինչպէս նաեւ ձայնային ռումբ եւ ձգախեժէ փամփուշտներ արձակեցին: Պաղեստինեան իշխանութեան
նախագահ Մահմուտ Ապպաս յայտնեց, որ ինք պահանջած է, որ Իսրայէլի վարչապետ Պենիամին Նեթանիահու
«առեւանգումն ու ոճիրը դատապարտէ, ճիշդ ինչպէս մենք դատապարտեցինք երեք իսրայէլացիներուն
առեւանգումը»: Ան իսրայէլեան իշխանութիւններուն կոչ ուղղեց «(վրէժխնդրական) յարձակումները
դադրեցնելու համար գետնին վրայ շօշափելի քայլերու դիմելու»: Կարճ ատեն ետք Նեթանիահու
դատապարտեց «քստմնելի ոճիրը»: Նշենք, որ Համաս շարժումի քաղաքական գրասենեակի նախագահ
Խալետ Մաշաալ յայտնեց, որ «Շարժումը Այսրյորդանանի Գալիլիա շրջանին մէջ իսրայէլացի երեք
բնակեցուածներուն սպանութեան հետ կապ չունի»` աւելցնելով. «Շարժումը առնչուած չէ կացութեան
մագլցումին եւ կառչած կը մնայ հանդարտեցման համաձայնութեան»: Միւս կողմէ, «Սքայ Նիուզ»
հաղորդեց, որ Մաշաալ Թուրքիոյ ղեկավարութենէն խնդրած է միջամտել` կանխարգիլելու համար
Կազայի դէմ իսրայէլեան հաւանական որեւէ յարձակում: Նշենք, որ իսրայէլեան օդուժը երէկ
շարունակեց հարուածել Կազան, իսկ պաղեստինեան դիմադրութիւնը իսրայէլեան բնակեցման վայրերուն
դէմ տասնեակներով հրթիռներ արձակեց: