Bashkësitë fetare amerikane në mbrojtje të lirisë fetare
Akti për Rivendosjen e Lirisë Fetare (Religious Freedom Restoration Act - RFRA) është
“një nga garancitë juridike më jetike të kombit tonë për lirinë fetare dhe për të
drejtat e ndërgjegjes së çdo njeriu, çfarëdo feje t’i përkasë”. Për këtë arsye nuk
duhet “ndryshuar” apo “shfuqizuar”. Thirrjen e bëjnë udhëheqësit e feve kryesore në
Shtetet e Bashkuara – ndër të cilët është edhe kryetari i Konferencës Ipeshkvnore
të Shteteve të Bashkuara, Imzot Joseph Kurtz – në një letër anëtarëve të Kongresit,
në të cilën theksohet rëndësia e ligjit për lirinë fetare, miratuar njëzëri më 1993.
Ligji jep një kornizë normative shumë të përshtatshme, e cila, pohojnë udhëheqësit
fetarë, “i mbron të drejtat dhe liritë e individëve të të gjitha feve, përfshirë më
të dobëtit”. “Në shtetet e Bashkuara, liria fetare e ka kuptuar gjithmonë dhe duhet
ta kuptojë gjithmonë të drejtën për ta jetuar fenë dhe për të vepruar sipas ndërgjegjes
edhe përjashta vendit të kultit”, lexohet më tej në letër, ku kujtohet se “për më
shumë se dy dekada” ky ligj “i ka mbrojtur amerikanët e të gjitha feve nga presionet
e qeverisë”. Dokumentin e kanë nënshkruar përfaqësuesit e bashkësive baptiste,
presbiteriane, aventiste të ditës së shtatë, luterane, hebraike, hindu, budiste etj... Nesër,
me një meshë të udhëhequr nga Kardinali Donald Wuerl në bazilikën kombëtare të Zojës
së Papërlyer në Washington, do të mbyllet edicioni i tretë i veprimtarisë “Fortnight
for Freedom”, fushata për lirinë fetare e ipeshkvinjve amerikanë, që filloi më 21
qershor. Pesëmbëdhjetë ditë lutje, përsiatje, katekezë dhe shfaqje, për ta nxitur
bashkësinë katolike të tërheqë vëmendjen e opinionit publik tek mbrojtja e këtij parimi
themelor, gjithnjë e më të kërcënuar sot, nga politikat që kufizojnë të drejtën për
të mbajtur bindjet etike dhe fetare në pulik. Tema e këtij edicioni: “Liria për të
shërbyer”, dëshiron të nënvizojë lidhjen e ngushtë ndërmjet lirisë fetare dhe shërbimit
ndaj të varfërve dhe nevojtarëve.