Natë lutjeje, sonte, në Romë, për paqen në Siri e Irak. Do të fillojë në orën 19.00,
në Bazilikën e 12 Apostujve. Lutjen do ta kryesojë kardinali Tauran, kryetar i Këshillit
Papnor për dialogun ndërfetar. Është lutje për praninë e krishterë në këto troje,
për lehtësimin e vuajtjes së banorëve të martirizuar të këtyre viseve. Lutje drejtuar
Zotit për t’i dhënë fund konfliktit e për t’i hapur rrugën dialogut e paqes. Lutje,
me bindjen e besimtarit se nuk ka asgjë të pamundur për njeriun me fe të gjallë! Lutje
e përbashkët, drejtuar Zotit të vetëm të paqes, që dialogu të bëhet udha kryesore
për zgjidhjen e problemeve. Lutje, në të cilën mund të marrin pjesë simbolikisht
të gjithë besimtarët e botës, për të mos e soditur si spektatorë tragjedinë e madhe,
që luhet në Lindjen e Mesme.