Më 28 shtator Papa do të takohet me gjyshat e mbarë botës
Të diel, më 28 shtator, Françesku do të takohet, në Sheshin e Shën Pjetrit, me të
moshuarit dhe gjyshat e mbarë botës: takimi organizohet nga Këshilli Papnor për Familjen.
I titulluar “Bekimi i jetës së gjatë”, do të hapet në Sheshin e Shën Pjetrit, në orën
9.00, për të arritur kulmin në orën 10.30 me Meshën Shenjte, kryesuar nga Papa. Regjistrimet
për pjesëmarrje dhe njoftimet më të hollësishme u botuan në kanalin e internetit të
Dikasterit vatikanas, duke filluar që sot. Për frymën e nismës, flet organizatori,
kryetari i Këshillit Papnor për Familjen, imzot Vinçenco Palia: “E organizuam këtë
ngjarje, duke u nisur nga mendimi se pleqëria nuk është fund i jetës, por thirrje
për një mision të ri, me vlerë. Falë Zotit, jeta po bëhet gjithnjë më e gjatë, vitet
e fundme të saj, më të shëndetshme e, megjithatë, kjo temë nuk është prekur asnjëherë
me seriozitetin e duhur. Nuk ka as në politikë e as në ekonomi, e aq më pak në kulturë,
ndonjë përpjekje të dukshme e të dobishme, jo vetëm për njerëzit në moshë, por edhe
e sidomos për dobinë që mund t’i sjellin familjeve të tyre e mbarë shoqërisë, me
thesarin e përvojës, fituar në rrjedhë vitesh. Sipas meje, organizimi i kësaj dite
do të tërheqë vëmendjen e të gjithëve mbi rëndësinë e stinës së bardhë të jetës njerëzore.
Me nënvizimin se të moshuarit nuk janë thjesht njerëz, që kanë nevojë për vëmendje
e kujdes, por edhe të aftë për një perspektivë të re të jetës: duhet rimenduar, pleqëria
e tyre, prandaj, e duhet rimenduar edhe impenjimi i tyre në botë e në Kishë. E edhe
i Kishës për ta. Po sjell vetëm një shembull: përveç misionit tradicional të transmetimit
të fesë e të ndihmës që u japin bijve, impenjohen edhe në misione të tjera, njëlloj
të rëndësishme, si ai i lutjes, sepse kanë më shumë kohë të lirë, e i komunikimit
të Ungjillit, si Ana, Profetesha e Besëlidhjes së Vjetër. Gjithnjë lidhur me moshën
e bardhë, veç aspekteve civile, përfundoi imzot Palia, të moshuarit mund të transmetojnë
edhe një koncept të ri mbi ligështimin e jetës, që nuk duhet shikuar si akt i fundmë
i tragjedisë, por si shpresë për jetën e përtejme, të pasosur.