Papa në Azi: ipeshkvijtë vendas, ngjarje e madhe hiri
“Hera e parë që një Papë merr pjesë në Asian Youth Day - Ditë e rinisë aziatike (Ayd):
po i jetojmë me gëzim të madh ditët e përgatitjes të takimit rinor, që do të mbahet
më 10 deri më 17 gusht, në Daejon të Koresë së Jugut. Prania e Papës, natyrisht, do
të jetë ngjarje e madhe hiri”. E pohon këtë, në një mesazh dërguar Agjencisë Fides,
imzot Joel Bylon, ipeshkëv i dioqezës filipine të Legazpit, drejtor i punës baritore
me rininë në Zyrën për laikët dhe familjen, pranë Federatës së Konferencave Ipeshkvnore
të Azisë. Papa do t’i takojë të rinjtë e Ayd më 15 gusht e do ta kremtojë meshën
përfundimtare të ditës, më 17 gusht. Imzot Bylon shtoi se nuk është e domosdoshme
të jesh shtegtar në Ditën rinore, për të fituar hirin, që buron nga ky takim i jashtëzakonshëm.
Çdo njeri që pranon shpirtin e Ditës në ndërgjegjen e tij e dëshiron ta bëjë të vetin
me devocion bijnor, mesazhin e Papës Françesku, vijon, mund ta jetojë Ditën aziatike
të rinisë edhe në kombin e tij, si përvojë thellësisht domethënëse në nivel shpirtëror.
Prelati kujton, në përfundim, se secili nga ne, plak a i ri, është i thirrur të
jetë misionar i Ungjillit, të shpallë të vërtetat e fesë dhe të dëshmojë dashurinë
e Zotit në botë, siç e nënvizon Papa në nxitjen Evangelii Gaudium. I fton,
pastaj, të gjithë, të luten si për suksesin e Ditës, “që të sjellë fryte të begata”,
ashtu edhe për vizitën e parë të Papës Françesku në Azi.