Асвячэнне мазаікі абраза Маці Божай Будслаўскай адбылося ў Назарэце
27 чэрвеня 2014 г.
у назарэцкай базыліцы Звеставання Найсвяцейшай Панны Марыі адбылося асвячэнне мазаікі
аднаго з самых шанаваных у Беларусі абразоў – Маці Божай Будслаўскай. Ва ўрачыстай
літургіі з гэтай нагоды прынялі ўдзел каля 300 беларускіх вернікаў – удзельнікаў
Агульнанацыянальнай пілігрымкі ў Святую Зямлю. Цэлебравалі Эўхарыстыю Мітрапаліт Мінска-Магілёўскi
арцыбіскуп Тадэвуш Кандрусевіч, дапаможны біскуп Гродзенскай дыяцэзіі Юзаф Станеўскі,
Апостальскі візітатар для грэка-католікаў Беларусі архімандрыт Сяргей Гаек і шэраг
беларускіх святароў.
Напрыканцы літургіі адбылося асвячэнне табліцы з абразом
і быў прачытаны Акт прысвячэння Беларусі Беззаганнаму Сэрцу Найсвяцейшай Панны Марыі.
Пазней мазаіка будзе ўсталявана ў падворку Назарэтанскай Базылікі з левага боку ад
цэнтральнага ўваходу, паведамляе сайт Каталіцкага Касцёла ў Беларусі www.catholic.by.