Անձնասպանական գործողութիւն մը ցնցեց Լիբանանի Թայեունէ-Շաթիլայի շրջանը
Երկուշաբթի, 23 յունիսի կէս գիշերին, Շաթիլայի շրջանին մուտքին, Թայեունէի մէջ, լիբանանեան
բանակի անցարգելի մը մօտ տեղի ունեցաւ անձնասպանական գործողութիւն մը, որ ֆիզիքական եւ
նիւթական ծանր վնասներու պատճառ դարձաւ: Անձնասպանական գործողութիւնը տեղի ունեցաւ սրճարանի
մը առջեւ, ուր երիտասարդներ կը համախմբուին Մոնտիալի խաղերը դիտելու համար: Նախնական
տուեալներով, անձնասպանական գործողութեան հեղինակը կին մը եղած է: Նախքան գործողութիւնը
Ընդհանուր ապահովութեան ուժերը կրակած են ինքնաշարժին ուղղութեամբ: Զոհերու եւ վիրաւորներու
առումով հաղորդուեցան իրերամերժ տեղեկութիւններ: Լիբանանեան բանակի հրամանատարութիւնը
յայտարարեց, որ բանակայիններու շարքերէն զոհեր չկան: «Նաշրա» կայքը առաւօտեան ժամը 1:00-ին
հաղորդեց, որ պայթումին պատճառով արձանագրուած են 10 վիրաւորներ, որոնք փոխադրուած են
շրջակայ հիւանդանոցները: Անոնք թեթեւ աստիճանի վէրքեր ստացած են: Ըստ Կարմիր խաչին, վիրաւորներուն
թիւը 15 է: Անձնասպանական գործողութեան համար օգտագործուած ինքնաշարժը եղած է «Մերսետես
180» տիպի: