Françesku: jo drogave, po edukimit e punës për të rinjtë
Droga është shuplakë, që mban në këmbë një treg të turpshëm, e prandaj e pohoj përsëri
atë, që kam thënë edhe në raste të tjera: “Jo, çdo tipi të drogës!”. Thjesht, duke
përfshirë çdo formë të ligjësimit. Ky pohim ishte zemra e fjalimit, që Papa Françesku
u drejtoi anëtarëve të International Drug Enforcement Conference (Konferencës Ndërkombëtare
për ndalimin e drogës), të cilët i priti sot në audiencë.
Me drogën nuk
ka fjalë të tepërta, nuk i duhet bërë asnjë lëshim, sepse nuk ka asgjë të mirë. S’bën
tjetër, veçse t’ia shuajë trurin dhe zemrën atij, që shpreson të ndizet e të gëzojë,
kështu, ca çaste të këndshme, pak a shumë të gjata, pak a shumë të përsëritura. Papa
Françesku ia mbylli rrugën, në të gjitha drejtimet, si përdorimit të drogave, shuplakë
për njerëzimin, që vijojnë të përhapen në forma e përmasa tronditëse, siç pohoi në
krye të fjalës së tij, ashtu edhe trafikut të drogës, që e ushqen. Tregun e drogës
Papa e quajti ‘treg i turpit’,’treg tragjik’, që i kapërcen kufijtë kombëtarë e ndërkombëtarë,
duke kafshuar për vdekje viktimat më të pambrojtura, të rinjtë dhe adoleshentët. Françesku
shprehu dhimbjen e thellë, e jo më pak, shqetësimin atëror, por edhe theksoi me forcë
të madhe një koncept, me vlera përgjithësuese: “Droga nuk mundet me drogë! Droga
është një e keqe, e me të keqen nuk mund të ketë lëshime, as kompromise. Mendimi se
mund të kufizohet dëmi, duke lejuar përdorimin e ilaçeve psikike nga ana e njerëzve,
që vijojnë ta përdorin drogën, nuk çon në zgjidhjen e problemeve. Ligjësimi i të ashtuquajturave
‘droga të lehta’, edhe të pjesëshme, përveçse është i diskutueshëm në planin ligjor,
nuk sjell efektet e pritura”. As drogat zëvendësuese, vërejti Papa, nuk janë
mjekim i mjaftueshëm, por vetëm mënyrë e maskuar për t’u dorëzuar përballë këtij
fenomeni. Prej këndej, përsëritja, pa lojëra fjalësh, e një bindjeje të Papës: “Jo,
çdo tipi të drogës! Thjesht. Jo çdo tipi të drogës! Por për ta thënë këtë ‘jo’, i
duhet thënë po jetës, po dashurisë, po të tjerëve, po edukimit, po sportit, po punës,
po burimeve më të shumta të punësimit; mendojeni një të ri të rrethuar me 'jo' e
'as'. As studim, as punë. Kjo do të thotë mungesë horizonti, mungesë shprese, gjë
që ia hap natyrshëm rrugën vartësive të ndryshme, ndërmjet të cilave, vartësia nga
droga! Burimi i punës, edukimi, sporti, jeta e shëndetshme: kjo është rruga për parandalimin
e drogës”. Nëse do të realizohen këto ‘po’, shtoi Papa, nuk do të ketë më vend
për drogën, nuk do të ketë vend për shpërdorimin e alkoolit e vese të tjera. E pikërisht
për ta përhapur e për t’i dhënë forcë këtij rrethi virtuoz, kujtoi më pas, punon gjithnjë
Kisha, përmes veprimtarëve të saj e vullnetarëve, përherë pranë atyre, që kanë humbur
rrugën, që janë rrëmbyer nga vorbulla e drogës e që kërkojnë të rilindin e ta rifitojnë
dinjitetin e humbur. E megjithatë, shtoi me dhimbje Françesku, e gjithë kjo nuk mjafton:“Duhet
punuar për parandalimin. Kjo do të bëjë shumë mirë. Shembulli i të rinjve që, duke
dëshiruar të dalin nga vartësia e drogës, impenjohen në rindërtimin e jetës së tyre,
është nxitje për ta shikuar plot besim ardhmërinë”.