Waamini wanaweza kuonja uwepo endelevu wa Yesu Kristo katika hija ya maisha yao ya
kiimani kwa njia ya Neno la Mungu; Sakramenti za Kanisa, lakini kwa namna ya pekee
Sakramenti ya Ekaristi Takatifu, kumbu kumbu endelevu ya mateso, kifo na ufufuko wa
Yesu.
Kwa njia ya Fumbo la Ekaristi Takatifu, Yesu anajisadaka tena Altareni
ili aweze kuwa ni chakula na kinywaji cha maisha ya kiroho! Yesu anajionesha pia katika
matukio ya kila siku, lakini zaidi miongoni mwa maskini na wote wanaosukumizwa pembezoni
mwa Jamii! Hapa unaweza kuonja uwepo endelevu wa Yesu!
Baba Mtakatifu Francisko
katika ujumbe wake kwa watumiaji wa mitandao ya kijamii anasema kwamba, hakuna sababu
msingi ya mwamini kutokuwa na matumaini, kwani Yesu amewahakikishia kwamba, atakuwa
pamoja nao hadi utimilifu wa dahali!