Më 16 qershor përkujtohet Shën Kuiriku. Gjatë përndjekjeve të Dioklecianit,
në Ikon, qytet i Likaonit (sot në Turqi), jetonte një grua e pasur e fisnike, e cila
kishte mbetur e vejë, me një djalë në moshë të njomë, me emrin Kuirik. Ajo braktisi
shtëpi e katandi, për t’i shpëtuar përndjekjes, dhe shkoi drejt Seleucisë. Në Cilici
e ndaluan, bashkë me foshnjen, me padinë se ishte e krishterë. Pasi e pyetën gjatë,
me shpresë se do të hiqte dorë nga feja, nuk arritën ta mposhtnin dhe ajo nuk pranoi
t’u kushtonte fli idhujve. Legjenda tregon se, gjatë hetimeve, fëminë e mbante në
prehër qeveritari romak. Kur fëmia e dëgjoi nënën duke dëshmuar fenë përballë përndjekësve,
edhe ai tha se ishte i krishterë. Atëherë qeveritari e përplasi përtokë dhe e vrau.
Më 17 qershor përkujtohen katër shenjtorët mercedarë: Egjidi, Luigji, Gjoni
e Pali. Ndërsa shpallinin fenë në Krishtin, si misionarë në Marok, u ndaluan nga myslimanët,
të cilët i torturuan, u shkulën gjuhën, u prenë duar e këmbë dhe në fund u prenë kokat. Më
18 qershor përkujtohet shën Kallogjeri. Kallogjeri nderohet në Sicili, ku jetonte
një shenjtor heremit, me fuqi mrekullibërëse. Në Fragala’, qytet në ishullin jugor
të Italisë, është zbuluar dëshmia më e lashtë lidhur me kultin ndaj këtij shenjtori,
ku thuhet se ishte me prejardhje nga Kartagjena dhe vdiq në afërsi të qytetit Lilibeo.
Emri Kallogjer, në greqisht, do thotë “plak i hijshëm”, fjalë që përdorej për të treguar
heremitët. Më 19 qershor përkujtohet shën Romualdi. U lind në një familje
fisnike italiane dh u bë heremit pas një udhëtimi në Spanjë. Fama dhe dhuntitë, që
e stolisnin, ia hapën dyert e princërve dhe të prelatëve të kohës. Ktheu në fe Oktonin
III, i cili e emëroi abat, gjë që Romualdi e kundërshtoi me forcë dhe shkoi e u strehua
në Montecassino. Pas shtegtimeve të shumta heremitike, u vendos në Camaldoli, ku sot
gjendet një manastir me emrin e tij. Më 20 qershor përkujtohen martirët
Francesk Paçeko, Giovanni Battista Zolam, Pal Xinsuki, Pjetër Rinshei, Vinçenc Kaun,
Huan Kinsako. U dënuan me djegie në turrën e druve në Nagasaki (Japoni), më 1600,
për shkak të fesë në Krishtin. Më 21 qrshor përkujtohet Shën Luigj Gonzaga.
Biri i markezit Ferrante Gonzaga u lind më 19 mars 1568. I ati e ushtroi Luigjin në
përdorimin e armëve që në mituri, por në moshën 10 vjeçare shenjtori i ardhshëm e
kishte marrë vendimin: t’i kushtohej përvujtërisht Hyjit, duke bërë kushtin e pastërtisë.
Kur mbushi dymbëdhjetë vjeç mori kungimin e parë nga Shën Karl Borromeo e, më vonë,
vendosi të hyntë në Shoqërinë e Jezusit, por për këtë iu desh të luftonte dy vjet
me të atin. Hoqi dorë nga titulli e nga trashëgimia dhe hyri në kolegjin romak të
jezuitëve. U shërbeu pa u kursyer të prekurve nga murtaja, që kishte goditur Romën
më 1590 dhe që preku edhe atë vetë, duke i shkaktuar vdekjen më 1591, kur ishte vetëm
23 vjeç. Më 22 qershor është e diel, festa e Zotit.