Папа на Сусветны дзень місій: дзяліцца радасцю Евангелля
Сусветны дзень місій
– гэта прывілеяваная нагода для таго, каб вернікі на розных кантынентах праз малітву
і канкрэтныя жэсты праявілі салідарнасць з маладымі каталіцкімі супольнасцямі на місійных
тэрыторыях. Пра гэта гаворыцца ў пасланні папы Францішка на Сусветны дзень місій,
які будзе адзначацца 19 кастрычніка 2014 г. Пантыфік падкрэсліў, што адным з фундаментальных
элементаў місійнага досведу з’яўляецца радасць. Сам Езус жадаў, каб вучні сталі ўдзельнікамі
Яго радасці – адрознай і вышэйшай за тую, якую яны мелі раней, нагадаў Папа. Францішак
адзначыў, што пагрозай для сучаснага свету з’яўляецца індывідуалістычны смутак, які
нараджаецца ў сэрцы, схільным да камфорту і горычы. Ён існуе ад хворага пошуку павярхоўных
задавальненняў, ізаляванага сумлення. Таму сёння чалавецтва мае вялікую патрэбу ў
сустрэчы са збаўленнем, прынесеным Хрыстом. Ад гэтай сустрэчы і дзялення з беднымі
нараджаецца радасць Евангелля, перакананы Папа.
“Заклікаю, асабліва парафіяльныя
супольнасці, асацыяцыі і групы жыць братэрскім жыццём, заснаваным на любові Езуса
і ўвазе да патрэб самых няшчасных”, - падкрэсліў Святы Айцец і дадаў, што такое жыццё
будзе спрыяць, між іншым, моцным пакліканням да святарства і манаства. Папа адзначыў
таксама важную ролю свецкіх вернікаў у місійнай дзейнасці Касцёла і пажадаў паглыблення
іх падрыхтоўкі да апостальскага жыцця. “Бог любіць тых, хто дорыць радасць”, - напісаў
Пантыфік і падкрэсліў важнасць эканамічнай падтрымкі місійнай дзейнасці Касцёла.
Звяртаючыся
да мясцовых каталіцкіх супольнасцяў, Францішак заклікаў “не дазволіць скрасці ў сябе
радасці евангелізацыі”, а трываць у ёй, падтрымліваючы блізкія адносіны з Богам, дзелячыся
верай, надзеяй і евангельскай любоўю.