Տահեշի խմբաւորումի զինեալները մտադիր են գրաւել նաեւ Պաղտատը
Իրաքի եւ Շամի իսլամական պետութիւն (ՏԱՀԵՇ) խմբաւորումի զինեալները, որոնք նախապէս գրաւած
էին Մուսուլ եւ Թիքրիթ քաղաքները, մտադիր են գրաւել նաեւ Իրաքի մայրաքաղաք Պաղտատը:Ամերիկեան «Սայթ» խմբակի տուեալներով` խմբաւորման բանբեր Ապու Մոհամետ Ատնանի զինեալներուն կոչ ուղղած է գրաւելու Պաղտատը: «Մարտեր տակաւին չկան, սակայն շուտով պիտի մոլեգնին Պաղտատի եւ Քարպալայի մէջ», նշած է Ատնանի` աւելցնելով, որ իրենք Պաղտատի մէջ հաշիւ ունին մաքրելիք: Ան Իրաքի վարչապետ Նուրի Մալիքին «սարսափելի ոչ ատակ» որակած է:
Իրաքի երկրորդ մեծագոյն քաղաքը նկատուող Մուսուլէն ետք չորեքշաբթի օր իշխանութիւնները հաղորդած էին Սալահէտտին նահանգի մայրաքաղաք Թիքրիթի անկման մասին: Սակայն «Մայատին» երէկ հաղորդեց, որ իրաքեան բանակը յաջողած է Թիքրիթը առնել իր ամբողջական վերահսկողութեան տակ:
«Արապիյա» հաղորդեց, որ բախումներ տեղի կ՛ունենան Պաղտատ, Սալահէտտին եւ Անպար նահանգներու սահմանային շրջաններուն մէջ: Տեղեկութիւններ կը հաղորդուին նաեւ, որ մարտեր տեղի կ՛ունենան Սամարրա քաղաքի մօտ, որ Իրաքի մայրաքաղաքէն 125 քիլոմեթր հեռաւորութեան վրայ կը գտնուի:
Մինչ այդ, «Ռոյթըրզ» լրատու գործակալութիւնը հաղորդեց, որ իրաքեան բանակին փախուստի դիմելէն ետք քրտական ուժերը Քերքուքը առած են իրենց ամբողջական վերահսկողութեան տակ: Կը հաղորդուի, որ Փեշմերկաները չեն մասնակցիր երկու կողմերուն միջեւ ընթացող մարտերուն, այլ կը բաւարարուին քրտական շրջաններուն ապահովութեան հսկելով:
| All the contents on this site are copyrighted ©. |