Papa vlerëson mikpritjen e emigrantëve në Republikën Dominikane
Veprat shoqërore të Kishës në vend dhe drejtimi i mirë i flukseve të emigrantëve.
Ishin këto, argumentet kryesore, që u trajtuan nga Papa Françesku gjatë takimit me
presidentin e Republikës Dominikane, Danilo Medina Sánchez, i cili më pas u takua
edhe me sekretarin e Shtetit të Vatikanit, kardinalin Pietro Parolin, në praninë e
sekretarit për Marrëdhëniet me Shtetet, kryeipeshkvin Dominik Mambertì. Gjatë bisedimeve
të përzemërta, njofton një komunikatë zyrtare, u shpreh kënaqësia për marrëdhëniet
e mira ndërmjet Republikës Dominikane dhe Selisë së Shenjtë, duke nënvizuar kontributin
e çmuar shoqëror, që i jep Kisha vendit, posaçërisht në sektorët e edukimit, të shëndetësisë
dhe të bamirësisë.Përveç kësaj, përfundon nota, u shqyrtuan edhe disa çështje me interes
kombëtar e zonal, duke u ndaluar posaçërisht tek masat që janë marrë për t’u krijuar
emigrantëve kushtet lehtësuese në praktikat e pajisjes me dokumentet e duhura, në
vendin ku kërkojnë një jetë më të mirë.