Thirrje e Papës: ta zhdukim plagën e punës së të miturve: 168 milionë të shfrytëzuar
Mbrojtje shoqërore për dhjetra milionë fëmijë, që detyrohen të punojnë: e kërkoi Papa,
duke bërë thirrje gjatë audiencës së përgjithshme, në prag të Ditës së tyre botërore,
që do të kremtohet nesër. Janë 168 milionë fëmijët, për të cilët Ati i Shenjtë kërkoi
fëmijëri të shëndetshme. Duke ngritur lart fletpalosjen e Ditës e duke ia treguar
turmës për pak sekonda, Françesku pohoi: “Dhjetra mijëra fëmijë, dëgjojeni mirë
këtë, dhjetra mijëra fëmijë, detyrohen të punojnë në kushte poshtëruese, t’i nënshtrohen
formave të ndryshme të skllavërisë e të shfrytëzimit, e jo më pak, edhe shpërdorimeve,
keqtrajtimeve, diskriminimeve. Uroj nga zemra që bashkësia ndërkombëtare
t’i mbrojë e të përpiqet për ta zhdukur plagën e shfrytëzimit të fëmijëve. Ta thellojmë
impenjimin tonë, të gjithë, e posaçërisht familja, për t’u siguruar të miturve e të
miturave mbrojtjen e dinjitetit të tyre dhe mundësitë për një fëmijëri të shëndetshme. Fëmijëria
e qetë u krijon të miturve kushtet ta shikojnë me besim jetën dhe ardhmërinë”. Përgjegjësinë kolektive kujton edhe Organizata ndërkombëtare e punës: “Ta shtrijmë
mbrojtjen shoqërore: të luftojmë kundër punës së të miturve” është objektivi i fushatës
2014. E kjo, sepse, sipas denoncimit të Organizatës, numri i fëmijëve që shfrytëzohen
sot në botë ka arritur në 168 milionë, nga të cilët, 85 milionë detyrohen të bëjnë
punë jashtëzakonisht të rrezikshme.
Për këto fëmijë të shfrytëzuar e të shpërdoruar
Papa Françesku e ftoi turmën t’i lutet Zojës së Bekuar, që mbajti në krahë Foshnjën
hyjnore. E pas ftesës, i priu korit të besimtarëve, që e ndoqi Françeskun në lutjen
korale drejtuar Nënës së Krishtit, për të miturit e miturinë e tyre.