Një grup hebrenjsh ultra-ortodoksë, pushtoi Sallën e Çenakullit, ku nisi këngë e valle
fetare, pasi i nxori përjashta shtegtarët e krishterë, mbledhur aty për solemnitetin
e Rrëshajëve. Sipas burimeve të policisë izraelite, njofton agjencia AziaNjuz, grupi
përbëhej nga 30 hebrenj, që e zbatojnë pikë për pikë e pa asnjë lëshim, Ligjin e Moisiut.
Ndërmjet tyre, edhe Moshe Feiglion, parlamentar i Likudit, parti e kryeministrit Benjamin
Netanijahu. Çenakulli, ku Krishti hëngri Darkën e Mbrame me Apostujt, e ku mbi
ta ditën e Rrëshajëve, zbriti Shpirti Shenjt, është sallë, në katin e dytë të një
ndërtese pranë zonës të Malit Sion. Që nga shekulli XII nisi të mendohej se pikërisht
këtu, në katin përdhes, është varrosur Mbreti David, ndonëse një hamendje e tillë
shikohet me shumë dyshim nga arkeologët. Në ditën e fundit të vizitës së tij në
Tokën Shenjte, Papa Françesku pati leje të kremtonte në Çenakull një meshë, së bashku
me ipeshkvijtë e patriarkët vendas. Zona i përket shtetit të Izraelit e asnjë kishë
e krishterë nuk lejohet të kremtojë funksione fetare në këtë vend. Vetëm Gjon Pali
II e Papa Françesku e patën këtë mundësi. Në të kaluarën u fol shpesh për ta kaluar
Çenakullin nën kujdesin e Rojtarisë së Tokës Shenjte e cila, që në zanafillë e deri
në pushtimin otoman, ishte pronare e vendit shenjt. Rreth e rreth Çenakullit duken
shpesh shkrime fyese e dhunuese kundër të krishterëve. Pak ditë para vizitës së Papës
Françesku, grupe hebrenjsh konservatorë, manifestuan në Jeruzalem e mbi Malin Sion,
duke iu kundërvënë çdo mundësie kalimi të Çenakullit nën drejtimin e Rojtarisë të
Tokës Shenjte. Shpesh herë shtegtarët e krishterë e vizitojnë të hamendësuarin “Varr
të Davidit” në katin përdhes, duke u ndaluar gjatë në lutje. Hebrenjtë e grupit manifestues
e konsideruan këtë gjest “blasfemi” e “provokim”. Prandaj iu sulën vendit të shenjtë
e, duke pushtuar katin sipër, pasi i dëbuan të krishterët, nisën të këndojnë e të
vallëzojnë sipas riteve të fesë së tyre.