Пантыфік заклікаў не блытаць правасуддзя з помстай
Папа Францішак выступіў
супраць таго, каб падставай крымінальнага права былі цвёрдасць і запалохванне. Пантыфік
накіраваў сваё пасланне да ўдзельнікаў двух форумаў, якія адбудуцца ў Лацінскай Амерыцы
ў бліжэйшыя месяцы: Кангрэсу Міжнароднай асацыяцыі крымінальнага права, які пройдзе
ў Рыа-дэ-Жанейра, і Кангрэсу Лацінаамерыканскай асацыяцыі крымінальнага права, які
збярэцца ў гандурасскім Тэгусігальпу. Сёння замацоўваецца тэндэнцыя, калі людзі схільныя
думаць, што справа канчаткова вырашаецца пры захопе і асуджэнні злачынца, амаль не
звяртаючы ўвагі на сітуацыю, у якой застаюцца ахвяры. Папа назваў такі падыход памылковым,
паколькі правасуддзе ў такім выпадку блытаецца з помстай, вынікам чаго можа стаць
далейшае пашырэнне насілля. “Вопыт паказвае, што ўзмацненне жорсткасці мер пакарання
часта не вырашае сацыяльных праблем, не памяншае злачыннасці”, - напісаў Пантыфік.Такі
падыход можа выклікаць таксама сур’ёзныя праблемы для грамадства, напісаў ён, напрыклад,
перапоўненыя турмы або зняволеныя, якія ўтрымліваюцца без прысуду.
З хрысціянскага
пункту гледжання гаворка павінна ісці аб вяртанні справядлівасці ў адносінах да ахвяр,
а не аб нанясенні шкоды агрэсару, звярнуў увагу Францішак. У той жа час, ён заклікаў
да практыкавання рэсацыялізацыі. Пакаранне злачынцы заўсёды павінна суправаджацца
крокамі па яго “выпраўленні, паляпшэнні і выхаванні”. Папа адзначыў, што людзі становяцца
злачынцамі часта па прычыне “эканамічнай і сацыяльнай няроўнасці” або ўплыву “карупцыйных
сетак і арганізаванай злачыннасці”. Адных справядлівых законаў, такім чынам, не дастаткова,
каб перамагчы крымінал. Вырашальнае значэнне тут маюць “людзі, якія ў стане перакласці
гэтыя законы на практыку”.
Гаворачы пра пакаянне злачынцы , Папа адзначыў,
што ў гэтым выпадку справа не толькі ў “асабістай змене чалавека”, тут ёсць патрэба
ў “палітычным і інстытуцыянальным вымярэнні”. У канчатковым рахунку мэтай павінна
быць “рэабілітацыя і рэінтэграцыя правапарушальніка ў грамадства”, - нагадаў Святы
Айцец.