Papa Françesku vizitoi sot pasdite Bashkësinë e Shën Egjidit, në një takim kushtuar
kryesisht të varfërve, në qendër të Ungjillit të Jezusit, e edhe të veprimtarisë së
Bashkësisë, jetuar si miqësi e shërbim. Papa arriti në Trastevere në orën 17.00,
i shoqëruar nga profesor Andrea Riccardi. Do të përshkojë në këmbë sheshin e Shën
Marisë në Trastevere, ku do të takohet me besimtarët e do të shkëmbejë me ta përshëndetjet
e rastit. Në Bazilikë do të gjunjëzohet para ikonës të Zojës së Butësisë, figurja
më e lashtë prej druri e Marisë, që ekziston në Romë; pastaj do të dëgjojë disa dëshmi
e do t’u drejtojë fjalën besimtarëve, për të vijuar me një çast lutjeje. Pas largimit
nga Bazilika e Shën Marisë në Trastevere, gjithnjë në këmbë, Papa Françesku do të
vizitojë selinë e Bashkësisë, ku do të takohet me drejtuesit e Shën Egjidit, me disa
ipeshkvij, meshtarë, seminaristë, të sëmurë e grupe të tjera. Kujtojmë se në Bashkësinë
e Shën Egjidit shërbimi ndaj të varfërve është i pranishëm që kur u vu guri i themelit.
Ky shërbim vijoi të thellohet në rrjedhë kohe, duke marrë forma nga më të ndryshmet,
në ndihmë të të pastrehëve, të huajve, emigrantëve, “evropianëve të rinj”, refugjatëve,
romëve e sintëve, njerëzve të gjymtë, pleqve, të vetmuarve. Kudo është e pranishme
Bashkësia e Shën Egjidit, në Romë e në Botë, të varfërit janë në qendër të vëmendjes,
si familjarë të shënegjidasve. Me këtë realitet kishtar do të takohet Françesku, Papa
që shprehu qysh ditën e parë të papnimit, dëshirën për “një Kishë të varfër, të të
varfërve”.