Францішак падчас малітвы за мір: больш мужнасці патрэбна, каб заключыць мір, чым весці
вайну
Да мужных рашэнняў
у справе міру заклікаў папа Францішак 8 чэрвеня 2014 г. падчас вячэрняй малітвы за
мір у Святой Зямлі і ў свеце з удзелам прэзідэнтаў Ізраіля і Палестыны, Шымона Перэса
і Махмуда Абаса. Яна прайшла ў Ватыканскіх садах. Абодва лідэры прыехалі ў Ватыкан
паслядоўна пасля 18.00. Кожнага з іх Пантыфік вітаў асабіста ля ўваходу ў сваю рэзідэнцыю.
У 18.45 усе трое сустрэліся ў холе Дому св. Марты, паціснулі адзін аднаму рукі і абмяняліся
некалькімі словамі. Да іх далучыўся Патрыярх Канстантынопальскі Барталамей І. Затым
аўтамабілем яны адправіліся да месца малітвы ў Ватыканскія сады, на луг ў форме трыкутніка,
размешчаны паміж домікам Пія IV, рэзідэнцыяй Папскай акадэміі навук, і Ватыканскімі
музеямі. Сустрэча пачалася са слоў: “Няхай Пан дасць вам спакой! Мы сабраліся ў гэтым
месцы, ізраільцяне і палестынцы, юдэі, хрысціяне і мусульмане, каб узняць нашы малітвы
за мір для Святой Зямлі і ўсіх яе жыхароў”. Малітва была разбіта на тры часткі, кожная
з якіх была аддадзена адной з трох рэлігійных супольнасцяў: па чарзе, юдэйскай, хрысціянскай
і ісламскай.
На заканчэнне перад знакам спакою і пасадкай аліўкавага дрэва,
слова ўзялі папа Францішак, Шымон Перэс і Махмуд Абас.
Святы Айцец падзякаваў
двум прэзідэнтам і Патрыярху Барталамею за прыняцце запрашэння. Ён адзначыў, што ахвяры
канфліктаў і будучыя пакаленні патрабуюць ад адказных за сучасны свет “мужнасці міру”.
Папа падкрэсліў, што значна больш мужнасці патрэбна, каб заключыць мір, чым весці
вайну. Чалавечай сілы ў гэтай справе не дастаткова і трэба прасіць дапамогі ў Бога.
Францішак скончыў сваю прамову малітвай, каб Бог праз заступніцтва Панны Марыі навучыў
людзей міру і даў смеласць прыняцця канкрэтных мер па яго дасягненні.
“Зрабі
нас здольнымі пачуць крык нашых грамадзян, якія просяць нас, каб мы замянілі зброю
на прылады міру, нашы страхі на давер і напружанасць на наша прабачэнне. Падтрымлівай
у нас полымя надзеі, каб з церпялівай настойлівасцю прымалі рашэнні для дыялогу і
прымірэння, каб у канчатковым выніку перамог мір. Каб з сэрца кожнага чалавека былі
выгнаны такія словы, як: падзел, нянавісць, вайна! Пане, учыні раззбраенне языка і
рук, абнаві розумы і сэрцы, каб словам нашай сустрэчы заўсёды было “брат”, а стылем
нашага жыцця стала: шалом, мір, салам! Амэн”, - маліўся Папа.
Прэзідэнт Ізраіля
Шымон Перэс падкрэсліў , што мір не прыходзіць лёгка, і мы павінны прыкласці ўсе сілы
для яго дасягнення, і хутка, нават калі гэта патрабуе ахвяраў ці кампрамісаў. На яго
думку, ізраільцяне і палестынцы вельмі хочуць міру. “Мы павінны пакласці канец крыкам,
насіллю, канфліктам. Мы ўсе патрабуем міру, міру сярод роўных”, - сказаў ізраільскі
лідэр.
Палестынскі прэзідэнт Махмуд Абас, спасылаючыся на Каран, заявіў, што
Іерусалім лічыцца варотамі ў рай і прывёў словы св. Яна Паўла II, які казаў, што “калі
мір прыдзе ў Іерусалім, то яго спазнае ўвесь свет”.
У малітве таксама прынялі
ўдзел супрацоўнікі Святога Айца: кардынал Дзяржсакратар Пьетра Паралін; дэкан Калегіі
кардыналаў кардынал Анджэла Садана; старшыня Папскай рады “Iustitia et Pax” кардынал
Пітэр Тарксан; старшыня Папскай рады спрыяння хрысціянскаму адзінству кардынал Курт
Кох і старшыня Папскай рады па міжрэлігійным дыялогу кардынал Жан-Луі Таран.