Papa: Lumturitë, program pratik i shenjtërisë

Lumturitë janë program i jetës së të krishterit. Këtë pohoi sot Papa gjatë Meshës së mëngjesit, kremtuar në Shtëpinë e Shën Martës. Ati i Shenjtë e përqendroi gjithë homelinë tek Lumturitë, duke nënvizuar, një ditë pas takimit të lutjes për paqe në Vatikan, se duhet marrë guximi i butësisë, për ta mundur urrejtjen.

Lumturitë janë programi, karta e identitetit e të krishterit, tha Papa Françesku gjatë homelisë, një meditim i thellë, kushtuar Lumturive, për të cilat flet Ungjilli i sotëm. Nëse ndonjëri nga ne, pohoi, bën pyetjen: “Ç’duhet bërë për të qenë i krishterë i mirë?’, këtu e gjejmë përgjigjen e Jezusit, që na tregon sjellje, të gjitha kundër rrymës, në krahasim me gjithçka që do e bën bota. Pasuritë, vijoi Papa, nuk të sigurojnë asgjë. Për më tepër, kur zemra mbushet plot me pasuri, kënaqet me vetveten e në të nuk ka më vend për Fjalën e Zotit. Prandaj, lum ata, që vajtojnë, se do të ngushëllohen:
”Po bota na thotë: gëzimi, lumturia, dëfrimi, këto po, janë të bukura. Sepse kjo është jetë! E nuk do t’ia dijë fare, kthen kokën mënjanë, kur ka probleme sëmundjesh, dhimbjesh në familje. Bota nuk do të qajë, bota nuk i do dhimbjet. Dëshiron t’i mbulojë, t’i harrojë. Por vetëm njeriu, që i shikon gjërat ashtu siç janë e qan në zemër të vet, është i lum e do të gjejë ngushëllim. Ngushëllimin e Jezusit, jo atë të botës. Lum të butët në këtë botë, botë luftërash, që kur zu fill, botë sherresh, botë urrejtjesh, mërish. E Jezusi na thotë: larg luftërash, larg urrejtjesh. Paqe e butësi”.
Por, po të jem i butë në jetë, vijoi, njerëzia mendon se jam njeri pa mend, se nuk jam në gjendje ta kuptoj këtë jetë! Të mendojnë si të duan, tha Papa, po ti e di se nuk je budalla, se je i butë e se me këtë butësi do të trashëgosh Tokën: “Lum ata që kanë uri e etje për drejtësi, lum, shtoi, ata që luftojnë për një botë të drejtë. Nuk është vështirë, nënvizoi, të hysh në klikat e korrupsionit, në politikën e përditshme të do ut des (më jep, të jap). Gjithçka bëhet për interes. E ngarkohet me padrejtësi. Sa e sa njerëz vuajnë nga këto padrejtësi. Lum të mëshirshmit, se do të gjejnë mëshirë. Të mëshirshmit, pohoi Papa, janë ata që falin, që i kuptojnë gabimet e të tjerëve. Jezusi, sqaroi, nuk thotë “Lum ata që ahmerren, që e marrin hakun”. Por thotë:
“Lum ata që falin, që janë plot me mëshirë. Sepse ne të gjithë jemi ushtri të falurish. Të gjithë u falëm. Prej këndej, i lum është ai, që ecën në rrugën e faljes. Lum të pastrit në zemër, njerëz me zemër të thjeshtë, të pastër, pa ndyrësi, zemër që di të dojë pastërtisht. Lum veprimtarët e paqes. Po për ne është më e lehtë të jemi veprimtarë luftërash ose ngatërresash! Kur dëgjoj një gjë e vrapoj t’ia them tjetrit e t’ia tregoj ashtu si më pëlqen, paksi më gjerë e paksi më gjatë…. krijohet bota e përgojimeve. Thashethemnaja! E njerëzit që merren me thashetheme, nuk dinë ç’është paqja, janë armiq të paqes. Nuk janë të lum!”.
Lum të persektuarit për drejtësi. Këta njerëz, vijoi Papa, persekutohen vetëm e vetëm pse luftojnë për drejtësi. E ky është programi i Lumturive, që na e propozon Jezusi: sa i thjeshtë, aq i vështirë. E nëse dëshirojmë edhe më shumë, Jezusi na jep protokollin, sipas të cilit do të gjykohemi. Gjindet në Kapitullin e 25-të të Ungjillit sipas Mateut: “Isha i uritur, e më dhatë të ha; i etur, e më dhatë të pi; i sëmurë, e më vizituat; në burg, e erdhët e më patë”. Me këto dy gjëra: Lumturitë e Mateu 25, mund ta jetosh jetën e krishterë në nivelin e shenjtërisë:
“Pak fjalë, fjalë të thjeshta, por praktike për të gjithë, sepse kristianizmi është fe praktike: nuk është gjë për t’u menduar, është për t’u praktikuar, për t’u bërë. Sot, nëse keni pakëz kohë në shtëpi, merreni në dorë Ungjillin, Ungjillin e Mateut. Në fillim janë Lumturitë: kapitulli V. E do t’ju bëjë mirë t’i lexoni një herë, dy, tri herë. Të lexoni këtë program shenjëtërie. Zoti ju dhëntë hirin ta merrni vesh këtë mesazh!”.