Papa karabinierëve italianë: më 13 shtator, lutja në Redipulja për viktimat e luftës
Papa Françesku do të shkojë më 13 shtator në Mauzoleumin ushtarak të Redipuljas në
Itali. Vetë Ati i Shenjtë e dha këtë lajm sot në sheshin e Shën Pjetrit, në audiencë
me rreth 50 mijë karabinierë italianë, që kremtonin 200-vjetorin e themelimit të Armës.
Papa nënvizoi se thirrja e karabinierëve, të cilët veprojnë jo vetëm në Itali por
edhe jashtë saj – si në Shqipëri, për shembull – është shërbimi. Bir emigratësh
piemontezë, Papa Françesku ka dëgjuar për herë të parë për karabinierët, nga tregimet
e prindërve. Ndoshta, prandaj vërejti se historia e karabinerëve është historia e
Italisë. Vuri në dukje se ata përpiqen të jenë “ndërtues të paqes” në atdhe e jashtë
tij, aty ku duhen mbrojtur të drejtat e njeriut, në vende, që përshkohen nga konflikte
e tensione të çdo lloji. E Papa, në këtë kuadër, njoftoi: “Dëshiroj të shpall
se më 13 shtatorin e ardhshëm dua të shkoj shtegtar në Mauzoleumin ushtarak të Redipuljes,
në provincën e Goricies, për t’u lutur për të rënët e të gjitha luftrave. Rasti është
njëqindvjetori i fillimit të asaj tragjedie të madhe, që ka qenë Lufta I Botërore,
për të cilën kam dëgjuar shumë histori të dhimbshme nga goja e gjyshit, i cili ka
marrë pjesë në të në Piave…”. Para se të jepte këtë lajm, Papa i ftoi karabinerët
të jenë gjithnjë në mes të njerëzve. Kujtoi se stacionet e tyre janë pikë referimi
për italianët, të cilëve ata u shërbejnë me impenjim e përkushtim: “Të dashur
karabinierë, misioni juaj shprehet në shërbimin për të afërmin e ju impenjon çdo ditë
për t’iu përgjigjur besimit dhe vlerësimit të njerëzve për ju. Kjo kërkon gatishmëri
të vazhdueshme, durim, shpirtin e sakrificës e ndjenjën e detyrës”. Papa Françesku
kujtoi edhe të gjithë ata, që e kanë nderuar Armën, duke ofruar jetën për të shpëtuar
jetë të tjera. Përmendi veçanërisht Salvo d’Acquisto-n, për të cilin vijon çështja
e lumnimit: “Të mendojmë për shërbëtorin e Zotit, Salvo d’Acquisto, i cili,
23 vjeç, këtu pranë Romës, në Palidoro, ofroi spontanisht jetën e tij të re për të
shpëtuar jetën e njerëzve të pafajshëm nga brutaliteti nazist. Në gjurmët e kësaj
tradite të gjatë, vazhdoni me qetësi e bujari shërbimin tuaj, duke dëshmuar idealet,
që ju frymëzojnë ju dhe familjet tuaja, të cilat ju qëndrojnë gjithnjë afër”. Para
takimit me Papën, karabinerët morën pjesë në meshën e kremtuar nga Ordinari ushtarak,
imzot Santo Marcianò, i cili edhe e përshëndeti Atin e Shenjtë gjatë audiencës, së
bashku me Komandantin e Përgjithshëm të Armës dhe me Ministren italiane të Mbrojtjes.