Kryeministri japonez i dhuron Papës një pasqyrë “antipersekutim”
Sot paradite, Papa Françesku priti në audiencë kryeministrin e Japonisë, z. Shinzo
Abe, me të cilin, siç nënvizon komunikata e Sallës së Shtypit të Selisë së Shenjtë,
bisedoi për disa tema me aktualitet rajonal e ndërkombëtar, sidomos në nismat për
paqen e për stabilitetin në kontinentin aziatik, në impenjimin e Japonisë për zhvillimin
e Afrikës, në çështjet e ambientit e të çarmatimit bërthamor. E veçantë, dhurata
që i dha Atit të Shenjtë kryeministri japonez: një paqyrë e veçantë, fabrikuar nga
një zejtar i sotëm, por e njëjtë me paqyrat e përdorura nga të krishterët klandestinë
të shekullit XVII. Ata fshihnin në pasqyrë fugure e simbole kishtare me një teknikë,
që normalisht nuk i zbulon para syve të botës, por mjafton drita e diellit për t’i
parë. Kjo, që kryeministri i dhuroi Papës, pasqyron një kryq e një fugure të Jezusit.
Shinzo Abe shpjegoi se vetë Papa Françesku e kishte frymëzuar për këtë dhuratë,
pasi pati kujtuar historinë e Japonisë, ku krishterimi nuk u rrënjos nga meshtarët
e misionarët, por nga laikët, të cilët e mbajtën gjallë për dy shekuj e gjysëm, pavarësisht
nga persekutimi. “E ruajtën fenë përmes hirit të Pagëzimit”, pati thënë Ati i Shenjtë.
Kur misionarët u rikthyen në Japoni, gjetën një bashkësi të krishterë, që kishte trashëguar
frytet e kumtimit të parë të Ungjillit, farë e mbjellur nga misionarët e mëse 250
vjetëve më parë, detyruar të largoheshin për shkak të persekutimit.