Францішак адзначыў важнасць салідарнасці Касцёла з цыганскім народам
5 чэрвеня 2014 г.
папа Францішак прыняў ў Ватыкане ўдзельнікаў сустрэчы прадстаўнікоў епіскапатаў і
нацыянальных кіраўнікоў душпастырства цыган, якая праходзіць у Рыме. Двухдзённая праца
форума, арганізаванага Папскай радай пастырства эмігрантаў і падарожнікаў, адбываецца
пры ўдзеле дэлегатаў з 26 краін Амерыкі, Азіі і Еўропы. Часта цыгане знаходзяцца на
ўзбочыне грамадства і на іх глядзяць з варожасцю і падазронасцю. Яны амаль не ўключаны
ў палітычную, эканамічную і сацыяльную дынаміку краін пражывання, адзначыў Пантыфік.
Папа падкрэсліў, што цыганскі народ пакліканы рабіць свой унёсак у супольнае дабро
грамадства, і гэта будзе магчымым пры існаванні пачуцця ўзаемнай адказнасці і адэкватнай
дапамозе. Сярод прычын, якія правакуюць у сучасных грамадствах беднасць адной з частак
насельніцтва, на думку Святога Айца, можна вылучыць недахоп у адукацыйных структурах,
неабходных для культурнага і прафесійнага выхавання, цяжкасці з доступам да медыцынскай
дапамогі, дыскрымінацыю на рынку працы і адсутнасць годнага жылля. Самыя слабыя групы
грамадства, да якіх належаць і цыгане, лёгка становяцца ахвярамі новых форм рабства,
асабліва, калі ім не хапае дапамогі ў інтэграцыі і ўдзеле ў грамадскім жыцці.
Пантыфік
адзначыў важнасць салідарнасці Касцёла з цыганамі, а таксама дзейнасці нацынальных
і міжнародных арганізацый на карысць паляпшэння ўзроўню жыцця гэтага народа. “Сёння
як ніколі неабходна распрацаваць новыя падыходы ў грамадскай, культурнай і сацыяльнай
сферах, а таксама душпастырскую стратэгію Касцёла, каб адказаць на выклікі, якія ўзнікаюць
праз сучасныя формы пераследу, прыгнёту і не рэдка рабства”, - лічыць Францішак.