Papa: T’i bindemi Shpirtit të Shenjtë. Jo përfitimeve në Kishë
Kisha “nuk është e ngurtë”, Kisha është “e lirë”. Këtu e vuri theksin Papa Françesku
në meshën e mëngjesit, në Shtëpinë e Shën Martës. Gjatë homelisë, Papa bëri thirrje
të ruhemi nga tre grupe njerëzish, që mëtojnë të quhen të krishterë: “uniformistët”,
“alternativistët” dhe “përfituesit”. “Kisha nuk është shtëpia e tyre” – tha – ata
thjesht e marrin “me qira”.
Jezusi lutet
për Kishën dhe i kërkon Atit që ndër nxënëxit e tij “të mos ketë ndarje dhe ngatërresa”.
Papa Françesku u nis nga Ungjilli i ditës për të folur pikërisht për bashkimin në
Kishë. “Shumë vetë – vërejti – thonë se janë në Kishë”, por “janë me një këmbë brenda”,
ndërsa “tjetra nuk ka hyrë ende”. Në këtë mënyrë mbajnë hapur mundësinë “për të qenë
në të dy vendet”, “brenda dhe jashtë”. “Për këta njerëz – tha Ati i Shenjtë – Kisha
nuk është shtëpia e tyre, nuk e ndjejnë si të vetën. Sipas tyre, e kanë me qira”.
“Ka disa grupe – tha më tej – që e marrin Kishën me qira, por nuk e ndjejnë si shtëpinë
e tyre”. Papa numëroi tre grupe të krishterësh: në të parin hyjnë ata të cilët “duan
që të gjithë të jenë të barabartë në Kishë”. “Duke e martirizuar pakëz gjuhën italiane”
– tha me humor – mund t’i quajmë “uniformistë”:
“Uniformiteti. Ngurtësia.
Janë të ngurtë! Nuk e kanë atë liri, që jep Shpirti i Shenjtë. E ngatërrojnë predikimin
e Jezusit, në Ungjill, me doktrinën e tyre, me doktrinën e barazisë. E Jezusi nuk
ka dashur kurrë, që Kisha e tij të ishte e ngurtë. Kurrë. E këta, për shkak të këtij
qëndrimi, nuk hyjnë në Kishë. E quajnë veten të krishterë, e quajnë veten katolikë,
por qëndrimi i tyre i ngurtë i largon nga Kisha”.
Një tjetër grup – vijoi
– përbëhet nga ata që e kanë gjithmonë një ide të veten, “e cila nuk duan të jetë
si ajo e Kishës dhe e kanë si ‘alternativë’”. Këta janë alternativistët:
“Unë
hyj në Kishë, por me këtë ide, me këtë ideologji. E kështu, përkatësia e tyre në Kishë
është e pjesëshme. Edhe këta e kanë një këmbë jashtë Kishës. As për këta, Kisha nuk
është shtëpia e tyre, nuk e kanë të veten. E marrin Kishën me qira deri në një farë
pike. Ekzistonin edhe në fillim të predikimit të Ungjillit. Le të mendojmë gnostikët,
të cilët apostulli Gjon i frushkullon shumë fort. ‘Jemi... po, po... jemi katolikë,
por me këto ide’. Një alternativë. Nuk ndajnë me të tjerët ndjenjën e mirëfilltë të
Kishës”.
E grupi i tretë, tha në vijim, është grupi i atyre që “e quajnë
veten të krishterë, por nuk hyjnë përmes zemrës së Kishës”: janë “përfituesit”, ata
që kërkojnë përfitime, dhe shkojnë në Kishë, por për përfitime vetjake, dhe, si përfundim,
bëjnë pazare në Kishë”:
“Afaristët. I njohim mirë! Por kanë ekzistuar që
në fillim. Të kujtojmë Simon Magjistarin, të mendojmë Ananinë e Safirën. Këta përfitojnë
nga Kisha për leverditë e veta. Dhe i kemi parë nëpër bashkësitë famullitare apo dioqezane,
nëpër kongregatat rregulltare, disa bamirës të Kishës, shumë, eh! Fryheshin, duke
u paraqitur si bamirës dhe, në fund, mbas tavolinës, bënin pazare. As këta nuk e ndjejnë
Kishën si nënë, si të veten. E Jezusi thotë: ‘Jo! Kisha nuk është e ngurtë, një, e
vetme: Kisha është e lirë!’”.
Në Kishë, tha më tej Ati i Shenjtë, “ka shumë
dhunti, ka një larmi të madhe njerëzish dhe dhuratash të Shpirtit të Shenjtë!” Zoti,
vijoi Papa Françesku, na thotë: “Nëse dëshiron të hysh në Kishë, hyr për dashuri”,
për të dhuruar “tërë zemrën dhe jo për të bërë pazaret e leverditë e tua”. Kisha,
theksoi, “nuk është një shtëpi, që e merr me qira”, Kisha “është një shtëpi për të
jetuar”, “është si nëna”. Papa e pranon se kjo nuk është e lehtë, sepse “tundimet
janë të shumta”. Por, vuri në dukje, ai që e bashkon Kishën, ai që krijon “bashkimin
në larmi, në liri, në bujari, është vetëm Shpirti i Shenjtë”, “kjo është detyra e
tij”. Shpirti i Shenjtë, shtoi, “krijon harmoninë në Kishë. Bashkimi, në Kishë, është
harmoni”. Të gjithë, vërejti, jemi të ndryshëm, nuk jemi të barabartë, falë Hyjit”,
përndryshe “do të ishte ferr!”. E “të gjithë jemi të thirrur t’i bindemi Shpirtit
të Shenjtë”. Pikërisht kjo bindje, tha Papa, është “virtyti që do të na shpëtojë
nga ngurtësia, nga rreziku për të qenë ‘alternativistë’ dhe ‘përfitues’ ose afaristë
në Kishë: bindja ndaj Shpirtit të Shenjtë”. Dhe është pikërisht kjo bindje, ajo që
“e shndërron Kishën nga një shtëpi me qera, në shtëpi të veten”. “Zoti na dërgoftë
Shpirtin e Shenjtë, tha në përfundim Papa, dhe krijoftë këtë harmoni në bashkësitë
tona – në bashkësitë famullitare, dioqezane, në bashkësitë e lëvizjeve – Shpirti e
krijoftë këtë harmoni, sepse, siç thoshte një Atë i Kishës: Shpirti, Ai vetë është
harmonia”.