ԵԱՀԿ-ի գործող նախագահը կոչ ուղղած է վերջ տալու Հայ-Ազրպէյճանական թշնամանքին
Շուէտական «Տը Լոքըլ» կայքը կը հաղորդէ, որ Զուիցերիոյ նախագահ, ԵԱՀԿ-ի գործող նախագահ
Տիտիէ Պուրքհալթեր Հայաստանի եւ Ազրպէյճանի կոչ ուղղած է ջանքեր գործադրելու Լեռնային
Ղարաբաղի տագնապին խաղաղ լուծում տալու համար: Պաքու կատարած այցելութեան ծիրին մէջ
Պուրքհալթեր նաեւ կոչ ուղղած է կողմերուն պահպանելու զինադադարի համաձայնագիրը: Զուիցերիոյ
նախագահը առաջարկած է Փարիզի մէջ Հայաստանի եւ Ազրպէյճանի նախագահներուն միջեւ կատարել
հանդիպում մը, որուն շնորհիւ բանակցային հոլովոյթին մէջ կրնայ նոր փուլ սկսիլ: Աղբիւրը
կ՛աւելցնէ, որ Պաքուէն կը սկսի պաշտօնատարի եռօրեայ այցելութիւնը Հարաւային Կովկաս: Կը
նախատեսուէր, որ երեքշաբթի ան բարձր մակարդակի բանակցութիւններ ունենայ Վրաստանի մէջ,
իսկ այսօր` Հայաստանի մէջ: Նշենք, որ Պուրքհալթեր Պաքուի մէջ հանդիպումներ ունեցած
է Ազրպէյճանի նախագահ Իլհամ Ալիեւի եւ արտաքին գործոց նախարար Էլմար Մամետեարովի հետ:
Ալիեւի հետ հանդիպումին ընթացքին ան քննարկած է ԵԱՀԿ-ի եւ Ազրպէյճանի միջեւ համագործակցութեան
նոր երեւոյթներ եւ կոչ ուղղած է իրականացնելու Լեռնային Ղարաբաղի խնդիրի վերաբերեալ լարուածութիւնը
նուազեցնող միջոցառումներ: Ան Ալիեւին կոչ ուղղած է քայլ առ քայլ շարժելու դէպի խնդիրի
խաղաղ լուծում: Ան ըսած է, որ կ՛ողջունէ աշխուժացած բանակցութիւնները եւ յաջորդ նախագահական
հանդիպումը` իբրեւ խաղաղ լուծման տանող համակարգուած հոլովոյթի մեկնակէտ: Ուորլիք
Կ՛ողջունէ ԵԱՀԿ-ի Մինսքի խմբակի ամերիկացի համանախագահ Ճէյմս Ուորլիք «Թուիթըր» ընկերային
ցանցին վրայ կատարուած գրառումի մը մէջ ողջունեց ԵԱՀԿ-ի գործող նախագահին կոչը` վարելու
Լեռնային Ղարաբաղի տագնապի խաղաղ լուծման ուղղուած համակարգուած բանակցութիւններ: Պուրքհալթեր
Հասաւ Հայաստան ԵԱՀԿ-ի գործող նախագահ, Զուիցերիոյ Համադաշնութեան նախագահ, արտաքին
յարաբերութիւններու դաշնակցային բաժանմունքի ղեկավար Տիտիէ Պուրքհալթեր երէկ գիշեր պաշտօնական
այցելութեամբ Հայաստան ժամանեց: Այցելութեան ծիրին մէջ այսօր կը նախատեսուին Հայաստանի
եւ Զուիցերիոյ նախագահներու երկկողմանի, ապա` պաշտօնական պատուիրակութիւններու մասնակցութեամբ
ընդլայնուած կազմով բանակցութիւնները, որոնց աւարտին նախագահներ Սերժ Սարգսեան եւ Տիտիէ
Պուրքհալթեր պիտի տան միացեալ մամլոյ ասուլիս մը: Զուիցերիոյ նախագահը պիտի այցելէ
նաեւ Ծիծեռնակաբերդի յուշահամալիր եւ յարգանքի տուրք պիտի մատուցէ Հայոց ցեղասպանութեան
զոհերու յիշատակին: